'ഗേറ്റ്' അപേക്ഷ 28 വരെ

ആർട്സ്, സയൻസ്, ഹ്യുമാനിറ്റീസ്, കൊമേഴ്സ് വിദ്യാർഥികൾക്കും അവസരം

- 

കേന്ദ്ര വിദ്യാഭ്യാസ മന്ത്രാലയത്തിന്റെയോ മറ്റു സർക്കാർ ഏജൻസികളുടെയോ ധനസഹായം ലഭിച്ചേക്കാവുന്ന കോഴ്സുകളിലേക്കുള്ള ദേശീയപരീക്ഷയായ "ഗേറ്റിന്' (GATE: Graduate Aptitude Test in Engineering) സെപ്റ്റംബർ 28 വരെ അപേക്ഷിക്കാം. (1) എൻജിനീയറിങ്, ടെക്നോളജി, സയൻസ്, ആർക്കിടെക്ചർ, വിഷയങ്ങളിലെ മാസ്റ്റേഴ്സ്, ഡയറക്ട്-ഡോക്ടറൽ പ്രോഗ്രാമുകളിലെയും (2) എൻജിനീയറിങ്, ടെക്നോളജി, സയൻസ്, ആർക്കിടെക്ചർ, ഹ്യുമാനിറ്റീസ് വിഷയങ്ങളിലെ മാസ്റ്റേഴ്സ്, ഡോക്ടറൽ പ്രോഗ്രാമുകളിലെയും (3) വിദ്യാഭ്യാസമന്ത്രാലയത്തിന്റെ സാമ്പത്തിക സഹായമില്ലാത്ത ചില കോളജുകളിലെ പിജി പ്രോഗ്രാമുകളിലെയും പ്രവേശനാർഹത നിർണയിക്കുന്ന ദേശീയപരീക്ഷയാണ് 'ഗേറ്റ്', ഗേറ്റ് ഒരു പ്രവേശനപരീക്ഷയല്ല. യോഗ്യത നിർണയിക്കുക മാത്രമാണു ലക്ഷ്യം. പ്രവേശനത്തിനും ജോലിക്കും സ്കോളർഷിപ്പിനും താൽപര്യമുള്ളവർ ബന്ധപ്പെട്ട സ്ഥാപനങ്ങളിൽ യഥാസമയം അപേക്ഷിക്കണം. എൻജിനീയറിങ്, ടെക്നോളജി, ആർക്കിടെക്ചർ വിഷയങ്ങളിൽ അണ്ടർ ഗ്രാജുവേറ്റ് തലത്തിലെയും മറ്റു വിഷയങ്ങളിൽ അണ്ടർ ഗ്രാജുവേറ്റ് / പോസ്റ്റ് ഗ്രാജുവേറ്റ് തലങ്ങളിലെയും പ്രാവീണ്യമാണു “ഗേറ്റി'ൽ വിലയിരുത്തുക.

പൊതുമേഖലാ സ്ഥാപനങ്ങളിലെ നിയമനങ്ങൾക്കും സഹായകം

പ്രമുഖ പൊതുമേഖലാസ്ഥാപനങ്ങളിലെ നിയമനങ്ങൾക്കും ഗേറ്റ് യോഗ്യത സഹായകമായിരിക്കും. മുൻവർഷങ്ങളിൽ ഇങ്ങനെ നിയമനം നൽകിയവയിൽ ഇനിപ്പറയുന്നവയും ഉൾപ്പെടും. എയർപോർട്സ് അതോറിറ്റി ഓഫ് ഇന്ത്യ, ഭാരത് ഹെവി ഇലക്ട്രിക്കൽസ്, കോൾ ഇന്ത്യ, ഇന്ത്യൻ ഓയിൽ കോർപറേഷൻ, ബിഎസ്എൻഎൽ, ദാമോദർ വാലി കോർപറേഷൻ, ഇലക്ട്രോണിക്സ് കോർപറേഷൻ ഓഫ് ഇന്ത്യ, എൻജിനീയേഴ്സ്ഇന്ത്യ, നാഷനൽ അലൂമിനിയം കമ്പനി, നാഷനൽ ഹൈവേയ്സ് അതോറിറ്റി ഓഫ് ഇന്ത്യ, നാഷനൽ തെർമൽ പവർ കോർപറേഷൻ, ന്യൂക്ലിയർ പവർ കോർപറേഷൻ, ഓയിൽ ആൻഡ് നാച്ചുറൽ ഗാസ് കോർപറേഷൻ, സ്റ്റീൽ അതോറിറ്റി ഓഫ് ഇന്ത്യ.