பெர்சியின் விசித்திர பை கேக் பிரச்சனை

அது பிப்ரவரி 13, காதல் வனம் சுறுசுறுப்பாக இயங்கிக் கொண்டிருந்தது.

- சுசித்ரா ராமதுரை

மறுநாள் எமரால்டு குளத்தைச் சுற்றியுள்ள பகுதியில் நடைபெறவிருந்த தங்கள் வருடாந்திர காதலர் தின கண்காட்சிக்கு வனவாசிகள் தயாராகிக்கொண்டிருந்தனர். குளம் மற்றும் அதன் வளாகத்தின் இறுதி சுத்தம் நடந்து கொண்டிருந்தது, அதற்கு ஸ்டெல்லா முள்ளம்பன்றி பொறுப்பேற்று இருந்தது.

"குல்மோஹர் மரத்திற்கு அருகில் உள்ள தொட்டிகளுக்கு குப்பைகளை கொண்டு செல்லும்போது யாரும் குப்பைகளை போடாமல் பார்த்துக் கொள்ளுங்கள்" என்று தன்னார்வலர்களுக்கு நினைவு படுத்தியது ஸ்டெல்லா.

விற்பனையாளர்கள் தங்கள் கூடாரங்கள் மற்றும் பொருட்களுடன் வரத் தொடங்கினர். ஜோஜோ கரடி, டிரிஃப்ட் மரத்தில் செதுக்கப்பட்ட இதய வடிவப் பெட்டிகளைக் கொண்டு வந்தது, மேலும் டிப்பி மான் ஸ்ட்ராபெரி ஜாம் கொண்ட இதய வடிவ ஜாடிகளை அடுக்க தொடங்கியது. புத்திசாலி வின்னி ஓநாய், தன் கைகளாலேயே இதய வடிவ எம்பிராய்டரி கைக்குட்டைகளை உருவாக்கியது,

"ஒரு விற்பனையாளரை மட்டும் இன்னமும் காணவில்லை. பெர்சி எங்கே?" ஸ்டெல்லா தனது பட்டியலைச் சரிபார்த்த பிறகு தனது உதவியாளர் மிண்டு குரங்கைக் கேட்டது.

"இன்று காலை நான் அதன் வீட்டைக் கடந்து சென்றபோது, சத்தமாக குறட்டை விடுவதை கேட்டேன்," என்று ஜோஜோ தனது ஸ்டாலில் இருந்து பதில் அளித்தது.

ஸ்டெல்லா பெர்சி பன்றியைப் பார்க்க மிண்டுவை அனுப்ப முடிவு செய்தது.

அங்கு செல்ல செல்ல, மிண்டுவுக்கும் பெர்சியின் குறட்டையை கேட்க முடிந்தது.

"டிார்..காரர்மம்ப்ப்ஹ்.. ட்ர்ர்ர்ர்,” பெர்சியின் உரத்த குறட்டை சத்தத்தால் வீட்டின் ஜன்னல்களும் கதவுகளும் கூட அதிர தொடங்கின. மிண்டு வெளியே மரத்தில் ஏறி, பெர்சியின் ஜன்னலை எட்டிப் பார்த்தது. பெர்சி தனது படுக்கையில் அயர்ந்து தூங்கிக் கொண்டிருந்தது.

"நம்பவே முடியவில்லையே," மிண்டு நினைத்தது. "நம் காட்டின் மிகவும் கடின உழைப்பாளிகளில் ஒன்றுதான் பெர்சி. பெர்சியின் பை கேக்குகள் பிரபலமானது, அதை வாங்க பலர் விரும்புவார்களே. நான் பெர்சியை எழுப்பியே ஆக வேண்டும்."

மிண்டு ஜன்னல் வழியாக உள்ளே நுழைந்து பெர்சியை எழுப்ப ஆரம்பித்தது.