ഉറക്കം വന്നാൽ ഉറങ്ങണം!

ബാലഭാസ്കറും കൊല്ലം സുധിയും ജഗതി ശ്രീകുമാറും പോലെ മരണപ്പെട്ടവരും പരുക്കു പറ്റിയവരും അടങ്ങിയ നീണ്ട നിര തന്നെയുണ്ട് രാത്രികാല യാത്രകളിലെ ദുരന്ത കഥാപാത്രങ്ങളായി

- ദിലീപ് കുമാർ കെ. ജി മോട്ടർ വെഹിക്കിൾസ് ഇൻസ്പെക്ടർ

വാഹനം തനിയെ ബ്രേക്ക് ചെയ്യപ്പെടുന്ന രീതിയിലുള്ള ബ്രേക്ക് സിസ്റ്റവും ലെയ്ൻ കീപ്പിങ് അസിസ്റ്റും തുടങ്ങിയ അഡാസ് ലെവൽ ടു സുരക്ഷാ മാനദണ്ഡങ്ങൾ പാലിക്കുന്ന വാഹനമാണ്. പിന്നെങ്ങനെയാണ് അത് ബസിലേക്ക് ഇടിച്ചു കയറി മൂന്നുപേർ കൊല്ലപ്പെടുന്നത്.

സമീപകാലത്ത് രാത്രി നടന്ന അപകടത്തെക്കുറിച്ച് ചിലരെങ്കിലും ഉന്നയിച്ച സംശയമാണ് ഇത്. ഇതിന്റെ ഏറ്റവും ലളിതമായ ഉത്തരം എതിരെ വന്ന ബസ്സിന് അത് ഇല്ല എന്നുള്ളതാണ്. നേർക്കു നേരെയുള്ള കൂട്ടിയിടിയിൽ ഒരു വാഹനം മാത്രം നിന്നതുകൊണ്ട് യാതൊരു പ്രയോജനവും ഉണ്ടാകാൻ പോകുന്നില്ല.

ബാലഭാസ്കറും കൊല്ലം സുധിയും ജഗതി ശ്രീകുമാറും പോലെ, മരണപ്പെട്ടവരും പരുക്കു പറ്റിയവരും അടങ്ങിയ നീണ്ട നിര തന്നെയുണ്ട് കേരളത്തിലെ രാത്രികാല യാത്രകളിലെ ദുരന്ത കഥാപാത്രങ്ങളായി.

എല്ലാ മനുഷ്യരിലും ഒരു ബയോളജിക്കൽ ക്ലോക്ക് പ്രവർത്തിക്കുന്നുണ്ട്. ദിനവും ഉറങ്ങുന്ന സമയമാകുമ്പോൾ മനസ്സും ശരീരവും ആ പ്രവൃത്തിയിലേക്ക് സ്വാഭാവികമായിത്തന്നെ വഴുതിവീഴും. ദിനം മുഴുവൻ വിശ്രമമില്ലാതെ അധ്വാനിച്ചിട്ട് രാത്രിയും, രാത്രി മുഴുവൻ ഉറക്കമിളച്ചിട്ട് പകലും ഡ്രൈവിങ് വീലിനു പിറകിൽ ഇരിക്കുമ്പോൾ ഓർക്കുക, താൻ മാത്രമല്ല കൂടെ യാത്ര ചെയ്യുന്നവർക്കും ജീവനു ഭീഷണിയാകുന്ന പ്രവൃത്തിയാണ് അതെന്ന്.