സിനിമ തന്ന വാഹനം

പ്രേമലു സിനിമയിലൂടെ മലയാളിയുടെ ഇഷ്ടതാരമായിമാറിയ ശ്യാം മോഹൻ തന്റെ ആദ്യ വാഹനവിശേഷങ്ങൾ പങ്കുവയ്ക്കുന്നു..

-  ഉമറുൾ ഫാറൂഖ് എസ്.

മലയാളത്തിന്റെ നൂറുകോടി ചിത്രം പ്രേമലുവിനൊപ്പം ഹിറ്റടിച്ച കഥാപാത്രമായിരുന്നു പ്രേമലുവിലെ ആദി. ആദിയെന്ന കഥാപാത്രത്തെ അവതരിപ്പിച്ച ശ്യാം മോഹൻ തന്റെ ആദ്യ വാഹനമായ ഫോക്സ്വാഗൺ ടൈഗൂൺ സ്വന്തമാക്കിയിരിക്കുകയാണ്.

സിനിമ തന്ന വാഹനം എന്ന ക്യാപ്ഷനോടെ വാഹനത്തിന്റെ ചിത്രം ശ്യാം സോഷ്യൽ മീഡിയയിൽ പങ്കുവച്ചിരുന്നു. പുതിയ വാഹനത്തിന്റെ വിശേഷങ്ങൾ ഫാസ്റ്റ്ട്രാക്കിനോട് പങ്കുവയ്ക്കുകയാണ് ശ്യാം.

ആദ്യ വാഹനം

എന്റെ ആദ്യത്തെ വാഹനമാണ് ഫോക്സ് വാഗൺ ടൈഗൂൺ. അങ്ങനെ വണ്ടിഭ്രാന്തുള്ള ആളല്ല ഞാൻ. ശരിക്കും പറഞ്ഞാൽ വണ്ടി എടുക്കുന്ന കാര്യം ആലോചിച്ചിട്ടു പോലുമില്ലായിരുന്നു. സിനിമയിൽ വരുന്നതിനു മുൻപ് കോർപറേറ്റ് കമ്പനികളിൽ സേഫായ ജോലികളിൽ ഇരുന്നപ്പോൾ പോലും ഒരു വാഹനത്തെപ്പറ്റി ആലോചിച്ചിട്ടില്ല. അതെന്തു കൊണ്ടാണെന്ന് എനിക്കറിയില്ല. പിന്നെ ജോലി റിസൈൻ ചെയ്ത് തേരാപാരാ സിനിമയ്ക്കു വേണ്ടി നടന്ന സമയത്തും വണ്ടി എന്ന സ്വപ്നം ഉണ്ടായിരുന്നില്ല.

സിനിമയിൽ വന്നശേഷവും ഊബർ, മെട്രോ എന്നിവയെയാണ് യാത്രയ്ക്ക് ആശ്രയിച്ചിരുന്നത്. അന്നൊന്നും പബ്ലിക്കിന്റെ ഇടയിൽ യാത്ര ചെയ്യുന്നതിന് ബുദ്ധിമുട്ടുണ്ടായിരുന്നില്ല. പക്ഷേ, പ്രേമലു ഇറങ്ങിക്കഴിഞ്ഞപ്പോൾ അതു ചെറിയ ബുദ്ധിമുട്ടാകാൻ തുടങ്ങി. ആളുകൾ എവിടെ വച്ചു കണ്ടാലും ഒരു സ്നേഹവും ഇഷ്ടവും ഒക്കെ കാണിക്കാൻ തുടങ്ങി. ഫാമിലിയായിട്ട് പോകുമ്പോൾ ഫാമിലിക്ക് അത് ബുദ്ധിമുട്ടാകാൻ തുടങ്ങി. പരിപാടികൾക്കു പോകുമ്പോൾ പലപ്പോഴും ഊബർ വിളിച്ചിട്ട് കാത്തുനിൽക്കേണ്ട അവസ്ഥ ഉണ്ടായിട്ടുണ്ട്. അങ്ങനെയാണ് ഒരു വാഹനം വേണം എന്ന തീരുമാനത്തിലെത്തുന്നത്. അല്ലാതെ സിനിമയിൽ വന്നതു കൊണ്ട് ഒരു വണ്ടി എടുക്കാം എന്നു കരുതി എടുത്തതല്ല.