പ്രാർഥന ഒന്നേയുള്ളൂ...

മൈറ്റോകോൺഡ്രിയൽ സൈറ്റോപതി എന്ന ജനിതക രോഗം വലയ്ക്കുന്ന രണ്ടു മക്കളെ ചേർത്തു പിടിച്ചു മഞ്ജു പറയുന്നു. "പ്രാർഥന ഒന്നേയുള്ളൂ മക്കളുടെ ആരോഗ്യം മാത്രം'

- രൂപാ ദയാബ്ജി

എട്ടു വർഷം മുൻപാണ്. പള്ളി പെരുന്നാളിനു കളിച്ചു തിമിർക്കുന്നതിനിടെ 11 വയസ്സുകാരൻ റോഹന്റെ കാൽ ഏതോ കല്ലിൽ തട്ടി. ഇടതുകാലിലെ തള്ളവിരലിന്റെ നഖം ഇളകി തൂങ്ങിയ നിലയിലാണ് അവൻ വീട്ടിലെത്തിയത്. ഒടിഞ്ഞ നഖം മുറിച്ചുമാറ്റി, മുറിവു കഴുകി മരുന്നുവച്ചു മോന്റെ കരച്ചിലടക്കി അമ്മ മഞ്ജു, കുറച്ചു ദിവസം കഴിഞ്ഞപ്പോൾ മുറിവു പഴുത്തു. ഡോക്ടർ എടുത്തുമാറ്റിയ കുറ്റിനഖത്തിനു കീഴിൽ പുതിയ നഖം വന്നെങ്കിലും അതു പഴുത്തു. അങ്ങനെ ഏഴുവട്ടം റോഹന്റെ നഖം പഴുത്ത് ഇളകിപ്പോയി.

അന്ന് ഇളകിപ്പോയ കാൽനഖത്തിൽ തുടങ്ങിയതാണു റോഹന്റെ ആശുപത്രിവാസം രണ്ടു വർഷത്തെ പരിശോധനകൾക്കൊടുവിൽ ശരീരത്തിന്റെയാകെ രോഗ പ്രതിരോധശക്തിയെ ബാധിക്കുന്ന ജനിതക രോഗമാണു റോഹനെന്നു ഡോക്ടർമാർ മഞ്ജുവിനോടും ഭർത്താവു ജിജോയോടും പറഞ്ഞു. തൊട്ടുപിന്നാലെ അടുത്ത വെള്ളിടിയുമെത്തി, റോഹന്റെ ചേട്ടൻ റൂബനും ഇതേ അസുഖമാണെന്നു തിരിച്ചറിഞ്ഞു.

“മരുന്നും ചികിത്സയും ജീവിതകാലം മുഴുവൻ വേണ്ടിവരും. എട്ടു വർഷത്തെ ചികിത്സയ്ക്കായി 75 ലക്ഷം രൂപയിലേറെ ചെലവായി. വീടു വിറ്റാണു കഴിഞ്ഞ വർഷം കടങ്ങൾ തീർത്തത്. മരുന്നു വാങ്ങാൻ പണമില്ലാതെ വിഷമിക്കുന്ന ഘട്ടങ്ങൾ നിരവധി ഉണ്ടായിട്ടുണ്ട്. മക്കൾ ആരോഗ്യത്തോടെ ഇരിക്കാനായി സ്വന്തമായുള്ളതെല്ലാം നഷ്ടപ്പെടുത്താൻ തയാറാണ്.'' റൂബനെയും റോഹനെയും ചേർത്തു പിടിച്ചു മഞ്ജു പറഞ്ഞു തുടങ്ങി, എട്ടു വർഷത്തെ ആശുപത്രിക്കഥ.

കളിചിരിക്കാലം, പനിക്കാലം

കോട്ടയം പനച്ചിക്കാടിനടുത്തു ചോഴിയക്കാട്ടെ വാടക വീട്ടിൽ മഞ്ജുവും മക്കളായ റോഹനും റൂബനുമുണ്ട്. ലോറി ഡ്രൈവറായ അച്ഛൻ ജിജോ രാവിലെ ജോലിക്കു പോയി. നാട്ടകം ഗവൺമെന്റ് കോളജിൽ ബികോം വിദ്യാർഥികളായ റോഹനും റൂബനും സെമസ്റ്റർ പരീക്ഷയ്ക്കുള്ള തയാറെടുപ്പിലാണ്.