ചിരിയുടെ മാത്തമാറ്റിക്സ്

ഒരു പതിറ്റാണ്ടിലേറെയായി ചിരിപ്പിച്ചു ചിന്തിപ്പിച്ച മറിമായം ടീം ഒന്നിച്ചൊരു സിനിമയിൽ അഭിനയിക്കുന്നു

- വിജീഷ് ഗോപിനാഥ്

കുറച്ചു വർഷം മുൻപു ചിരിയുടെ പാചകക്കുറിപ്പു വളരെ എളുപ്പമായിരുന്നു. നിറത്തെ കളിയാക്കൽ നാലെണ്ണം നൈസായി അരിഞ്ഞത്, സ്ത്രീകളെ പരിഹസിക്കൽ മൂന്ന് സ്പൂൺ, ഉയരക്കുറവു നീളത്തിൽ മുറിച്ചത്. പിന്നെ ആവശ്യത്തിനു ദ്വയാർഥ പ്രയോഗം. ഇതെല്ലാം കൂടി തിളപ്പിച്ചാൽ ചിരി രസായനമായി.

പക്ഷേ, കാലം മാറി. ഇമ്മാതിരി മായം ചേർന്ന കൂട്ടുമായിറങ്ങിയാൽ പിള്ളേര് എടുത്ത് ഉടുക്കും. അവർ ചിരിക്കുന്നില്ലെന്നു മാത്രമല്ല സോഷ്യൽമീഡിയ വഴി എയറിലാക്കാനും തുടങ്ങി. ഇപ്പോൾ പഴയ പാകത്തിനു ചിരിയുടെ പാൽ പായസം വച്ചു കൊടുത്താലും പ്രേക്ഷകർക്കു പുക ചുവയ്ക്കും.

അതു മനസ്സിലാക്കിയതുകൊണ്ടാണു മറി മായം ഒരു പതിറ്റാണ്ടിലേറെയായി മായമല്ലാതെ ഇങ്ങനെ ചിരിപ്പിക്കുന്നത്. ബോഡിഷയിമിങ് ഇല്ല, സ്ത്രീവിരുദ്ധതയില്ല. പകരം സമൂഹത്തിലെ ചലനങ്ങൾ കോമഡിയുടെ ചട്ടിയിൽ കിടന്നു ചിരിച്ചു തുള്ളുന്നു.

13 വർഷമായി. എഴുന്നൂറിലധികം എപ്പിസോഡുകൾ. "നവ കുടുംബ യാത്രയും ചട്ടിച്ചോറും സിനിമാ റിവ്യൂവും എല്ലാം വൻ ഹിറ്റ്. ഇപ്പോൾ മറിമായം ടീം സ്വന്തമായി സിനിമ സംവിധാനം ചെയ്ത് അഭിനയിക്കുന്നു. പേര് പഞ്ചായത്ത് ജെട്ടി സംവിധാനം “സത്യശീലനും' പ്യാരിയും

വിനോദ് കോവൂർ: സംവിധാനം മണികണ്ഠൻ പട്ടാമ്പിയും സലിം ഹസനും കൂടിയാണെന്ന് പറയുന്നതിനെക്കാൾ ആൾക്കാർക്കു മനസ്സിലാകാൻ എളുപ്പം മറിമായത്തിലെ കഥാ പാത്രങ്ങളുടെ പേരു പറയുന്നതു തന്നെ. ഞങ്ങളുടെ ശരിക്കുള്ള പേരിനെക്കാൾ പ്രേക്ഷകർക്ക് അറിയാവുന്നത് അതാണ്.

യാത്രയ്ക്കിടയിൽ ചിലരെ കാണുമ്പോൾ ഓടി വന്നു ചോദിക്കും, ഇങ്ങള് മൊയ്തു അല്ലേ, കുറേ ദിവസം മുന്നേ ഷൊർണൂരിൽ നിന്നു സത്യശീലനെ കണ്ടിരുന്നു. മണ്ടൂന് കുട്ടിയായല്ലേ''ഞങ്ങളുടെ ശരിക്കുമുള്ള പേരു മാറി.

എന്താണ് ഈ ചിരിയുടെ മാത്തമാറ്റിക്സ്?

മണികണ്ഠൻ: ഞങ്ങൾ ഒരു മായവും ഇല്ലാത്ത ആളുകൾ ആണ്. അതു തന്നെയാണ് വിജയം. എല്ലാവരും തുറന്ന മനസ്സുള്ളവർ. ഏതു സന്ദർഭമായാലും സത്യസന്ധമായി പെരുമാറുമ്പോഴല്ലേ ആളുകൾ മനസ്സിലേക്ക് എടുക്കൂ...

നിയാസ് മറിമായം ഒരു തരം പൊതുപ്രവർത്തനമാണ്. സമരവും ജാഥയും ഒന്നും ഇല്ല എന്നേയുള്ളൂ. ജനങ്ങൾക്കു വേണ്ടി സംസാരിക്കുന്നവയാണ് ഓരോ എപ്പിസോഡും. അഭിനയത്തെ അങ്ങേയറ്റം പ്രണയിക്കുന്നവരാണു ഞങ്ങൾ.