மக்களை பிழியும் மோடி பொருளாதாரம்!

பிரதமர் மோடி எளிமையாக சொல்லும் சில ஆலோசனைகள் கடுமையாக மக்கள் வாழ்வாதாரத்தை பாதித்து விடுவது கடந்த கால எதார்த்தம்.

- வரிப்பையூரான்

பணமதிப்பு நீக்கம், மேக் இன் இந்தியா, ஒரே நாடு, ஒரே ரேஷன் உள்ளிட்ட பல திட்டங்களை எளிதாக அறிவித்தார். ஆனால், அது கடினமான பாதிப்பை மக்களுக்கு ஏற்படுத்தி விட்டது.

அப்படித்தான் தற்போது தற்சார்பு இந்தியா என்னும் இலக்கை நோக்கி இந்தியப் பொருளாதாரத்தைப் பலப்படுத்துவதற்கு 7 முக்கிய கோரிக்கைகளை முன் வைத்துள்ளார்.

அடுத்த ஓராண்டுக்கு தேவையற்ற தங்கம் வாங்குவதைத் தவிர்க்க வேண்டும். பெட்ரோல் மற்றும் டீசல் பயன்பாட்டைக் குறைத்து, எரிபொருள் சேமிப்பை வலியுறுத்த வேண்டும். தனிநபர் வாகனங்களுக்கு பதிலாக பொதுப் போக்குவரத்து மற்றும் மெட்ரோ சேவைகளை அதிகம் பயன்படுத்த வேண்டும்.

இரசாயன உரங்களை தவிர்த்து இயற்கை விவசாயத்தை நோக்கி நகர வேண்டும். உள்நாட்டுப் பொருட்களை அதிகம் பயன்படுத்தி இந்திய உற்பத்தியை ஆதரிக்க வேண்டும். தேவையற்ற வெளிநாட்டுப் பயணங்களை தவிர்த்து உள்நாட்டு சுற்றுலாவை ஊக்குவிக்க வேண்டும் என்றெல்லாம் ஆலோசனைகளை அள்ளி வீசியுள்ளார். அறிவுரை சொன்ன அடுத்த கணமே வெளிநாட்டு பயணத்திற்கு அவர் ஆயத்தமானது வேறு கதை.

மேற்கண்ட ஆலோசனைகள் எல்லாம் ஏற்கனவே பல்வேறு அரசு திட்டங்களாக வடிவமைத்துள்ளார். ஆனால் அவை ஏட்டளவிலேயே இருப்பது தான் இன்றைய இழிநிலை.

பொதுப் போக்குவரத்தை பயன்படுத்துமாறு அறிவுறுத்துவது ஒரு பக்கம் இருந்தாலும் ... ரயில்வே போன்ற பொதுப் போக்குவரத்துகளில், சாதாரண வகுப்புப் பெட்டிகளை குறைத்தும், வந்தே பாரத் உள்ளிட்ட மோசடி கட்டண கொள்ளை ரயில்களை நுழைத்தும் ஏழைகள், நடுத்தர வர்க்கத்தினருக்கு ரயில் பயணத்தை மறக்கடித்தது இந்த மோடி அரசுதான்.

இரசாயன உரங்களுக்குப் பதிலாக இயற்கை உரம், உயிரி உரங்கள் மற்றும் பூச்சி விரட்டிகளை தயாரிக்க விவசாயிகளுக்கு பயிற்சியும் மானியமும் வழங்கும் திட்டம் இதுவரை எந்த வயல்களையும் எட்டிப் பார்க்கவில்லை.