என்னவாகும் தமிழ்நாடு?

2000 ஆண்டுகளுக்கு முன்னர் உலகில் ஆறே ஆறு சமுதாய மக்களே முக்கியமானவர்கள்.

- பரிதி

தமிழர்கள், சீனர்கள், ஆரியர்கள், அரபியர்கள், ரோமர்கள், கிரேக்கர்கள்.

கிரேக்கர்கள் மற்றவர்களை பிசாசுகள் என அழைத்தனர்.

ரோமர்கள் தங்களை ஆளப்பிறந்தவர்கள் எனவும் மற்றவர்கள் வாழத் தகுதி அற்றவர்கள் எனக் கருதினர். அரபியர்கள் தங்களைப் பேசத்தெரிந்தவர்கள் எனவும் மற்ற மக்களை ஊமையர்கள் எனவும் கூறினர்.

ஆரியர்கள் தங்களை உயர்ந்தவர்களாகவும் கடவுளுக்கு நிகரானவர்கள் என்றும் மற்றவர்களை கீழானவர்களாகவும் கருதினர்.

சீனர்கள் தங்களை முதலாளிகளாகவும் மற்றவர்களை அடிமைகளாகவும் நடத்தினர்.

தமிழர்கள் மட்டும், 'யாதும் ஊரே யாவரும் கேளிர்' என்றனர். ஏனென்றால், தமிழர்கள் மட்டும்தான் இந்த உலகில் இருக்கும் அனைத்து உயிர்களையும் நேசிக்க தெரிந்தவர்கள்- இது சமூக வலைத்தளங்களில் சுற்றும் பதிவு.

இதில் பெருமளவு உண்மை உண்டு. தமிழர்கள் தங்கள் தனித்த மொழி, வாழ்வியல், பண்பாடு மூலம் மாறுபட்ட மக்கள் கூட்டமாக வாழ்ந்தனர். எனவே, தமிழ் இனத்தை அழிப்பதற்கு பல்வேறு முயற்சிகள் மேற்கொள்ளப்பட்டன.

மோதி அழிக்க முடியாது என்பதற்காக மொழியை அழிக்க முயன்றனர். கலகம் விளைவித்து கவிழ்க்க முடியாததால் கலாச்சார குழப்பம் ஏற்படுத்தினர்.

அந்த முயற்சியின் தொடர்ச்சிதான் ஹிந்தி, சமஸ்கிருத மொழித்திணிப்பு, இந்துத்துவ பண்பாட்டு இணைப்பு, வடவருக்கான தொழில்-வேலை வாய்ப்பு நுழைப்பு.

மூன்றாம் மொழி என்ற புதிய கல்விக்கொள்கை தமிழர்களை குறிவைத்து விடப்பட்ட அம்பு. சிந்து நதி முதல் கீழடி வரை இந்தியாவில் பரவிக்கிடந்தது தமிழர் நாகரீகம் என்பது அந்நியர்களும் ஒப்புக்கொள்ளும் ஆய்வு முடிவு.

ஆனாலும், இந்திய ஒன்றியத்தில் சமஸ்கிருதம் தான் பழமையான மொழி என்று புனைவு பரப்பப்படுகிறது. அண்மையில் மராட்டிய மாநிலம் நாக்பூரில் உள்ள காளிதாஸ் சமஸ்கிருத பல்கலைக்கழகத்தில் நடைபெற்ற விழாவில் கலந்துகொண்ட ஆர்.எஸ்.எஸ். தலைவர் மோகன் பகவத் “சமஸ்கிருதம் இந்தியாவின் அனைத்து மொழிகளுக்கும் தாய். அது மேலும் வளர வேண்டும் என்றால், மக்களின் அன்றாட தொடர்பு மொழியாக சமஸ்கிருதம் மாற வேண்டும், அனைவரும் சமஸ்கிருத மொழியை பேசக் கற்றுக்கொள்ள வேண்டும்” என பேசியுள்ளார்.