പ്രസവരക്ഷ ശിക്ഷയാകല്ലേ

അശാസ്ത്രീയമായ പ്രസവാനന്തര പരിചരണം ആരോഗ്യത്തിന് ദോഷം ചെയ്യും. അതൊഴിവാക്കാൻ വേണം കരുതൽ

-  പി.വി. സുരാജ്

ശാരീരികമായും മാനസികമായും വെല്ലുവിളികൾ നിറഞ്ഞ കാലമാണ് പ്രസവശേഷമുള്ള ആദ്യ മാസങ്ങൾ. കൃത്യമായ പരിചരണം ആവശ്യ മായ കാലം. എന്നാൽ, പലപ്പോഴും പ്രസവാനന്തര ശുശ്രൂഷയുടെ പേരിൽ അശാസ്ത്രീയവും അനാരോഗ്യകരവുമായ ചിട്ടകൾ അമ്മമാരുടെ മേൽ അടിച്ചേൽപ്പിക്കാറുണ്ട്.

പ്രസവശേഷം ഗർഭപാത്രം, യോനീഭാഗം മുതലായ പ്രത്യുത്പാദനാവയവങ്ങൾ പൂർവസ്ഥിതിയിലെത്താൻ നാലുമുതൽ ആറാഴ്ച വരെയെടുക്കും. വയറ്റിലെ പേശികൾ ഒൻപതുമാസത്തോളം വലിഞ്ഞു നിന്നതിനാൽ, പ്രസവം കഴിയുമ്പോൾ അടിവയറും യോനീഭാഗവും അയഞ്ഞുതൂങ്ങും. പ്രത്യേക വ്യായാമങ്ങളിലൂടെ ഇതിന് പരിഹാരം കാണാവുന്നതാണ്.

ചില സ്ത്രീകൾക്ക് പ്രസവത്തിന്റെ അവസാനഘട്ടത്തിൽ അല്പം പ്രയാസമനുഭവപ്പെടാം. കുഞ്ഞിന്റെ തലയുടെ സമ്മർദം വരുമ്പോൾ, മൂത്രസഞ്ചിക്ക് ചെറിയരീതിയിൽ ക്ഷതം സംഭവിക്കും. മാത്രമല്ല, പ്രസവ ശേഷം മൂത്രസഞ്ചിയുടെ വിസ്തൃതി വർധിക്കുകയും ചെയ്യാം. ഇതെല്ലാം മൂത്രസഞ്ചിക്ക് അണുബാധയുണ്ടാകാ നുള്ള സാധ്യത കൂട്ടും. ഇതുണ്ടാകാതെ നോക്കേണ്ടത്, പ്രസവാനന്തര ശുശ്രൂഷയുടെ ഭാഗമാണ്.

വിശ്രമം അമിതമാവരുത്

പ്രസവം കഴിഞ്ഞാൽ ദേഹമനക്ക രുത്, പൂർണവിശ്രമം വേണം, പടികയറാൻ പാടില്ല തുടങ്ങിയ നിർദേശങ്ങൾ ലഭിക്കാറുണ്ട്. എന്നാൽ, ഗർഭകാല പ്രസവം കഴിഞ്ഞോ കൃത്യമായ കാരണമില്ലാതെ പൂർണവിശ്രമമെടുക്കുന്നത് അഭികാമ്യമല്ല.

മുലപ്പാലൂറാനും അത് നിലനിൽക്കാനും കുഞ്ഞിന് മുലയൂട്ടാനുമുള്ള സാഹചര്യവും സൗകര്യവും അമ്മമാർക്കുണ്ടാവണം. എന്നാൽ, പൂർണമായി വിശ്രമിക്കണമെന്നല്ല അതിന്റെ അർഥം. പ്രസവം കഴിഞ്ഞുള്ള ആറാഴ്ച രക്തം കട്ടപിടിക്കാനുള്ള സാധ്യത കൂടുതലാണ്. പ്രസവം കഴിഞ്ഞ് അമിതമായി വിശ്രമിക്കുന്നവരുടെ കാലിൽ രക്തം കട്ടപിടിക്കുകയും അത് ഹൃദയത്തിലെ രക്തക്കുഴലിലടിഞ്ഞ് ഗുരുതരമായ ആരോഗ്യപ്രശ്നങ്ങൾക്ക് ഇടയാക്കുകയും ചെയ്തേക്കാം.

ചോറ് കഴിച്ചാൽ മുലപ്പാൽ കൂടില്ല