பங்களாதேஷை இன்னிங்ஸால் வீழ்த்திய இலங்கை முதலாவது WTC வெற்றிப் புள்ளிகளை ஈட்டியது

பங்களாதேஷுக்கு எதிராக எஸ்.எஸ்.சி. விளையாட்டரங்கில் நேற்று சனிக்கிழமை நான்காவது நாள் காலையுடன் நிறைவடைந்த இரண்டாவது டெஸ்ட் கிரிக்கெட் போட்டியில் ஓர் இன்னிங்ஸ் மற்றும் 78 ஓட்டங்களால் இலங்கை அமோக வெற்றியீட்டியது.

- (எஸ்.எஸ்.சி. அரங்கிலிருந்து நெவில் அன்தனி)

பங்களாதேஷின் கடைசி 4 விக்கெட்டுக்களை வீழ்த்துவதற்கு நேற்றைய தினம் இலங்கைக்கு 5.4 ஓவர்களும் 28 நிமிடங்களுமே தேவைப்பட்டது.

இந்த வெற்றியுடன் 2 போட்டிகள் கொண்ட டெஸ்ட் தொடரை 1-0 என்ற ஆட்டக்கணக்கில் இலங்கை தனதாக்கிக் கொண்டது. அத்துடன் நான்காவது ஐ.சி.சி. உலக டெஸ்ட் சாம்பியன்ஷிப் (WTC) 20, 25, 27 சுழற்சிக்கான அத்தியாயத்தில் இலங்கை தனது முதலாவது வெற்றிப் புள்ளிகளையும் ஈட்டிக்கொண்டது.

பெத்தும் நிஸ்ஸன்க் குவித்த அபார சதம், தினேஷ் சந்திமால், குசல் மெண்டிஸ் ஆகிய இருவரும் பெற்ற அரைச்சதங்கள், பிரபாத் ஜயசூரிய இரண்டாவது இன்னிங்ஸில் பதிவுசெய்த 5 விக்கெட் குவியல் என்பன இலங்கையை இலகுவாக வெற்றியடையச் செய்தது.

அத்துடன், மூன்றாம் நாளன்று துடுப்பாட்டத்தின்போது உபாதைக்குள்ளாகி இரண்டாவது இன்னிங்ஸில் களத்தடுப்பில் ஈடுபடாமல் இருந்த குசல் மெண்டிஸ், நான்காம் நாள் காலை களத்தடுப்பில் ஈடுபட்டு இரண்டு ஆட்ட இழப்புக்களில் முக்கிய பங்காற்றி பிரபாத் ஜயசூரியவுக்கு 5 விக்கெட் குவியலைப் பதிவு செய்ய உதவினார். இது பிரபாத் ஜயசூரியவின் 12ஆவது 5 விக்கெட் குவியலாகும்.