சிக்கிக் கொண்ட கடற்படை

இலங்கை கடற்படையை சேர்ந்த ஒருவர் சர்வதேச கடற்படை செயலணி ஒன்றின் தளபதியாகப் பதவி வகிப்பது, அதன் முக்கால் நூற்றாண்டு வரலாற்றில் இதுவே முதல் முறை.

- சுபத்ரா

மத்திய கிழக்கில் போர் தீவிரமடைந்த போது, இலங்கைக் கடற்படைக்கு முக்கியமானதொரு சிக்கல் ஏற்பட்டது.

அது கடற்படைக்கானது மாத்திரமல்ல, இலங்கை அரசாங்கத்துக்குமானது தான்.

ஈரான் மீது இஸ்ரேல் தொடுத்த ஏவுகணை தாக்குதல், அதை அடுத்து இஸ்ரேல் மீது ஈரான் தொடங்கிய போர், இந்தப் போருக்கு உதவியாக ஈரானின் அணுசக்தி மையங்களை அழிப்பதாக கூறிக்கொண்டு அமெரிக்கா நடத்திய தாக்குதல்கள், இதற்குப் பதிலடி கொடுப்பதாக கூறிக் கொண்டு கட்டாரில் உள்ள அமெரிக்க தளங்களின் மீது ஈரான் தொடுத்த ஏவுகணை தாக்குதல்கள் — இவையெல்லாம் மத்திய கிழக்கை உச்சக்கட்ட பதட்டத்திற்குள் கொண்டு சென்றன.

எந்தளவுக்கு போர் உச்சத்தை நோக்கிச் சென்றதோ, அதே வேகத்தில் கீழ்நோக்கி தணிந்திருக்கிறது.

ஒன்றரை வருடங்களாக நீடிக்கும் காஸா-இஸ்ரேல் மோதல்கள், நான்கு வருடங்களாக நீடிக்கின்ற ரஷ்யா-உக்ரேன் போர் என்பவற்றைத் தாண்டி, மத்திய கிழக்கில் ஏற்பட்ட இந்த பதற்ற நிலை எல்லோருடைய கவனத்தையும் அதிகம் ஈர்த்தது.

இந்தப் போரில் இலங்கைக் கடற்படையினர் தவிர்க்க முடியாதபடி சிக்கிக் கொள்ளும் சூழலும் ஏற்பட்டிருந்தது.

அதற்கு முக்கியமான காரணம், முன்னாள் ஜனாதிபதி ரணில் விக்கிரமசிங்க தான்.

அவர் 2023 ஆம் ஆண்டு அமெரிக்காவுடன் ஏற்படுத்திக் கொண்ட உடன்பாட்டை அடுத்து, கூட்டு செயலணி (Combined Task Force) என அழைக்கப்படுகின்ற சர்வதேச கடற்படை அணியில் இலங்கை கடற்படை இணைந்து கொள்ளும் நிலை ஏற்பட்டது.

ரணில் விக்கிரமசிங்க பாராளுமன்றத்தின் ஒப்புதலைப் பெற்றுக்கொள்ளாமல் இந்த முடிவை எடுத்த போது, அது கடும் சர்ச்சைகளை ஏற்படுத்தியது.