தசாப்தங்களுக்கு பிறகு சிங்கள சிதைவுகள் சென்றடைகிற்து வருத்தம் தரும் ஒரு செய்தி

ஆறு மாதங்களாக அகழ்வாராய்ச்சியாளர்களும் தொல்லியல் நிபுணர்களும் வடஇலங்கையில் யாழ்ப்பாணத்தில் புதைகுழிகளிலிருந்து மனித எச்சங்களை கண்டெடுத்துக் கொண்டிருக்கிறார்கள். இதுவரையில் 200 க்கும் அதிகமான மனித எலும்புக்கூடுகளை அவர்கள் மீட்டிருக்கிறார்கள். அவற்றில் சிறுவர்களின் எலும்புக்கூடுகளும் அடங்கும்.

- தி இந்து

அந்த மனிதப் புதைகுழிப் பகுதியும் அதிகரிக்கும் எண்ணிக்கையில் கண்டெடுக்கப்படும் மனித எச்சங்களும் நாட்டின் தமிழ் ஊடகங்களில் தலைப்புச் செய்திகளை ஆக்கிரமித்திருக்கின்ற அதேவேளை, நாட்டின் பிரதான போக்கு ஆங்கில மற்றும் சிங்கள ஊடகங்களின் கவனத்தை அந்த செய்திகள் பெரிதாகப் பெறவில்லை. சினந்தரும் இந்த இடைவெளியைக் கண்ட மூன்று இளம் ஊடகவியலாளர்கள் அந்த செய்தியை சிங்களத்தைப் பேசும் பெரும்பான்மைச் சமூகத்துக்கு கட்டாயம் சொல்லியிருக்க வேண்டும் என்று தீர்மானித்தார்கள்.

அவர்கள் மூவரும் “செம்மணி" என்ற ஒரு சிங்கள நூலை எழுதுவதற்காக கடந்த சில மாதங்களாக வளங்களை திரட்டிக்கொண்டு (யாழ்ப்பாணத்தை இலங்கை இராணுவம் கைப்பற்றியதற்கு பிறகு 1990களின் நடுப்பகுதிகளில் கொல்லப்பட்ட தமிழ் குடிமக்களின் சடலங்கள் புதைக்கப்பட்டதாக நம்பப்படும் புதைகுழி பகுதிகளில் ஒன்றான) செம்மணிக்கு பல தடவைகள் சென்று வந்தார்கள்.

இளம் பத்திரிகையாளர்கள் சங்கத்தைச் சேர்ந்த தரிந்து ஜெயவர்தன, எம்.எவ்.எம்.பசீர், தரிந்து உடுவரகெதர ஆகியோரினால் எழுதப்பட்ட "செம்மணி" நூல் அண்மையில் கொழும்பில் தேசிய நூலக கேட்போர் கூடத்தில் இடம்பெற்ற நிகழ்வில் வெளியிட்டு வைக்கப்பட்டது. இது தமிழர்களுக்கு எதிராக அரச படைகளால் இழைக்கப்பட்ட அட்டூழியங்கள் தொடர்பிலான குற்றச்சாட்டுக்களை உறுதியாக நிராகரிக்கின்ற சிங்கள வாசகர்கள் மத்தியில் கவலைதரும் அந்த போர்க்காலக் கதையை அம்பலப்படுத்துவதற்கு மேற்கொள்ளப்பட்ட துணிச்சலான ஒரு முயற்சியாகும்.

போர் முடிவுக்கு வந்து 16 வருடங்கள் கடந்தோடிவிட்ட நிலையில், இலங்கை ஆயுதப்படைகளுக்கும் தமிழீழ விடுதலைப் புலிகளுக்கும் இடையிலான சண்டைகள் குறித்த எடுத்துரைப்புக்கள் வடக்கிலும் தெற்கிலும் மிகவும் முரணானவையாகவே இருந்து வருகின்றன. "பயங்கரவாதத்தை ஒழித்துக்கட்டிய போர் நாயகர்களாக" தங்களது படை வீரர்களை மதிக்கும் சிங்களவர்கள், தமிழ்க் குடிமக்களின் மரணங்கள் பற்றிய செய்திகளை நிராகரிக்கிறார்கள்.