பழைமையும் அற்புதங்களும் கொண்ட தம்பலகாமம் ஆதிகோணநாயகர் திருக்கோயில்

இலங்கையைச் சிவபூமி என்றார் திருமந்திரம் தந்த திருமூலர். இவ்வாறு போற்றப்பட்ட இத்தீவில் பழம்பெரும் வழிபாட்டிடங்கள் ஐந்து இருந்தமைக்கு கட்டியம் கூறி நிற்கின்றது புத்த துறவிகளால் எழுதப்பட்ட மகாவம்சம் எனும் நூல்.

- 

புத்தரின் அவதாரத்தின் போது இலங்கையில் விஜயன் கரையொதுங்கினான் என்றும், அவனுடன் உபதிஸ்ஸன் என்ற பிராமணனும் இருந்தானென்றும், இலங்கையில் நாலாதிசைகளிலு மிருந்த ஐந்து சிவாலயங்களை சென்று தரிசித்தார் என்றும் கூறப்பட்டுள்ளது. அதாவது இற்றைக்கு 2554 ஆண்டுகளுக்கு முன் புத்தர் பிறந்த காலத்தில் இலங்கையில் ஐந்து சிவாலயங்கள் இருந்தமை மகாவம்சத்தின் மூலம் உறுதியாகின்றது.

வடக்கே நகுலேஸ்வரம், கிழக்கே கோணேஸ்வரம், தெற்கே தொண்டீஸ்வரம், மேற்கே கேதீஸ்வரம், முன்னேஸ்வரம் ஆகியவையே உபதிஸ்ஸன் சென்று வழிபட்ட பஞ்சேஸ்வரங்கள் எனப்படும் சிவாலயங்கள் ஐந்துமாகும்.

இவ்வாறு பழைமையும், பெருமையும் கொண்ட ஐந்து சிவாலயங்களில் ஒன்றாக திருகோணமலையிலுள்ள திருக்கோணேஸ்வரம் விளங்குகின்றது. இதன் மூலம் இப்பிராந்தியம் பல்லாயிரம் ஆண்டுகளுக்கு முற்பட்ட, அதாவது உலகில் வழக்கிலுள்ள வேறு சமயங்கள் எதுவும் தோற்றம் பெறாத காலத்தில் இந்து சமயத்தவரின் புனித பூமியாகவும் பண்டைய இருப்பின், சிறப்பின் ஆதாரமாகவும் விளங்குகிறது.

ஏழாம் நூற்றாண்டில் திருஞானசம்பந்தமூர்த்தி நாயனாரால் தேவாரத் திருப்பதிகம் பாடப்பெற்ற திருக்கோணேஸ்வர திருத்தலத்துடன் வரலாற்று ரீதியாகத் தொடர்புபட்டதாக தம்பலகாமம் ஆதிகோணநாயகர் கோயில் விளங்குகின்றது. இதிகாச காலமான இராமாயண காலத்துடன் அதாவது ஆறாயிரம் ஆண்டுகளுக்கு முற்பட்ட காலத்துடன் தொடர்புகொண்டதாகக் கொள்ளப்படும் திருக்கோணேசர் ஆலயத்தை கி.மு. 1300 ஆண்டளவில் இப்பகுதியை ஆட்சி செய்த மனுராசா என்கின்ற தமிழ் அரசன் திருப்பணி செய்வித்ததாகவும் கூறப்படுகின்றது.

இவ்வாறான சிறப்புக்கொண்ட இச்சிவாலயம் கி.பி. 1624 இல் போர்த்துக்கேயரால் சிதைத்தழிக்கப்பட்டது. திருக்கோணேஸ்வரத்தை போர்த்துக்கேயப் படையினர் சிதைக்க முற்பட்ட வேளை அங்கிருந்த தெய்வத் திருவுருவங்களை அடியார்கள் எடுத்துச் சென்று கிணறுகளிலும், காடுகளிலும் மறைத்து வைத்தனர். அவ்வாறு மறைத்து வைக்கப்பட்ட விக்கிரகங்களில் சில தம்பலகாமத்துக்கு மேற்கேயுள்ள சுவாமிமலை என்று அழைக்கப்படும் இடத்திலும் கொண்டு செல்லப்பட்டு மறைத்து வைக்கப்பட்டு பாதுகாக்கப்பட்டதுடன் வழிபாடுகளும் செய்யப்பட்டன.