பாலியல் கல்வி

பாலியல் கல்வி என்பது மனித வாழ்க்கையின் அடிப்படை, இயற்கை மற்றும் அறிவாற்றலுடன் கூடிய பகுதியை நோக்கிச் செல்வது மட்டுமல்ல, மனித உரிமை, மதிப்பு, பாதுகாப்பு ஆகியவற்றையும் உள்ளடக்கிய மிக முக்கியமான அறிவுத்துறையாகும். இது ஒட்டுமொத்தமாக உடல் வளர்ச்சி, மனநிலை வளர்ச்சி, உறவுகள், சமூகப் பண்பாடு, பாலின அடையாளம், விருப்பங்கள், பாதுகாப்பான பாலியல் நடைமுறை போன்ற அனைத்தையும் அறிவிக்கும் ஒரு கல்வி வடிவமாகும்.

- பா.லோகேஸ்வரி, உளவியல் துறை, யாழ். பல்கலைக்கழகம்.

இன்றைய நவீன உலகத்தில், தகவல் பெருக்கம் அதிகரித்து வரும் நிலையில், இளம் தலைமுறைக்கு உறுதியான, துல்லியமான, அறிவுத்திறனோடு கூடிய பாலியல் கல்வி வழங்கப்பட வேண்டிய அவசியம் அதிகரித்து வருகிறது. குறைந்த வயதிலேயே தவறான தகவல்களின் அடிப்படையில் உருவாகும் புரிதல் குறைபாடுகள், எதிர்காலத்தில் பலவிதமான சமூக, உடல் மற்றும் உளவியல் சிக்கல்களை உருவாக்கக்கூடியதாக இருக்கிறது.

இந்த நிலையில், பாலியல் கல்வி என்பது வெறும் 'பாலுறவு' குறித்த தகவல்களை வழங்குவது மட்டுமல்ல, இளைஞர்கள் தங்களது உடலைப் புரிந்து கொள்ள, பரஸ்பர மரியாதையுடன் உறவுகளைக் கட்டியெழுப்ப, மற்றும் தங்களைப் பாதுகாத்துக் கொள்ள வேண்டிய திறன்களை வளர்த்தெடுக்க உதவும் முழுமையான வழிகாட்டியாகவும் இருக்கிறது.

பாலியற் கல்வி தேவையா இல்லையா என்பது பற்றிய சர்ச்சைகள் பரவலாகக் காணப்படுகிறதெனினும் அது ஓரளவுக்கேனும் பாடசாலை பாடத்திட்டத்தில் காணப்படுகிறது. எயிட்சின் தீவிர பரவல் பாலியற்கல்வியின் தேவையை அதிகரித்துள்ளது. ஆயினும் எந்த வயதில் பாலியற் கல்வி கற்பிக்கப்பட வேண்டும் என்பதிலும் எத்தகைய விடயங்கள் கற்பிக்கப்படலாம் என்பதிலும் சர்ச்சைகள் தொடர்கின்றன. பாலியல் என்றாலே பேசப்படக் கூடாத ஒரு விடயம் என்ற எண்ணப்பாடு சமுதாயத்தில் ஒவ்வொரு இளைஞர்கள், யுவதிகள் மத்தியிலும் காணப்பட்டு வருகின்ற மிக முக்கியமான விடயமாக உள்ளது.

ஆனால், அது தவறு. பாலியல் என்றால் என்ன? பாலியல் கல்வி என்றால் என்ன? என்பது தொடர்பில் ஒவ்வொருவரும் கட்டாயம் அறிந்திருக்க வேண்டும். பாலியல் கல்வி என்றால், ஒருவரின் உடல் வளர்ச்சி, பாலுறவு, உறவுகள், மனநிலை, பாதுகாப்பு, தனிநபர் உரிமை, பிறப்புத்தடுப்பு மற்றும் பாலியல் வழியாக ஏற்படக்கூடிய பிரச்சினைகள் குறித்து விஞ்ஞான மற்றும் சமூக அடிப்படையில் வழங்கப்படும் விழிப்புணர்வும் ஆகும். இது குழந்தைகள் மற்றும் இளம் வயதினர்களுக்கு அவர்களது உடல் மாற்றங்களைப் புரிந்துகொள்வதற்கும், தங்கள் உடலை மதிப்பதற்கும், பாதுகாப்பாக இருப்பதற்கும், உறவுகளை முறையாகப் புரிந்து கொள்வதற்கும் உதவுகிறது. பாலியல் கல்வி, தவறான தகவல்களிலிருந்து அவர்களைப் பாதுகாக்கவும், தவறான உறவுகளில் சிக்காமல் இருக்கவும் வழிகாட்டும். நேர்மையான பாலியல் கல்வி, ஒழுக்கத்தையும் மரியாதையையும் வளர்க்கும். இது பள்ளி, குடும்பம் மற்றும் சமூக மூலமாக வழங்கப்பட வேண்டும்.