૧૬ જાન્યુઆરીથી ધોરણ-૧૦ અને ૧૨ની પ્રિલિમ પરીક્ષાનો પ્રારંભઃ ગુજરાત શિક્ષણ બોર્ડની જાહેરાત

વાસી ઉત્તરાયણના બીજા દિવસે સામા પવને પરીક્ષાનું આયોજનઃ ધોરણ-૯થી ૧રના વિધાર્થીઓનો તહેવાર બગડે તેવી શક્યતા

- 

ગુજરાત માધ્યમિક અને ઉચ્ચતર માધ્યમિક શિક્ષણ બોર્ડ દ્વારા શાળાકીય પ્રવૃત્તિનું જે કેલેન્ડર જાહેર કરાયું છે તે મુજબ ધો. ૯થી ૧૨ના વિદ્યાર્થીઓની પ્રી-બોર્ડ પ્રિલિમિનરી પરીક્ષા ૧૬ જાન્યુઆરીથી ૨૪ જાન્યુઆરી સુધી યોજાશે. વાસી ઉત્તરાયણના બીજા દિવસે પ્રી-બોર્ડ પ્રિલિમ પરીક્ષાનું આયોજન કરાતાં વિદ્યાર્થીઓને સામા પવને પરીક્ષા આપવી પડશે, જેના કારણે ધો. ૯થી ૧૨ના વિદ્યાર્થીઓની ઉત્તરાયણ બગડશે.

શહેર-જિલ્લાની તમામ શાળાઓના વિદ્યાર્થીઓ પરીક્ષા આપશે. ઉત્તરાયણનો તહેવાર હોવાથી ઘોંઘાટ વચ્ચે વિદ્યાર્થીઓ વાંચી શકે તે શકય નથી, જેથી ઉત્તરાયણ પહેલાં જ વિદ્યાર્થીઓએ તેમનું રિવિઝન પૂરું કરી દેવું પડશે. આથી બોર્ડ દ્વારા જ્યારે સમયપત્રક ગોઠવાય છે ત્યારે તહેવારોને ધ્યાનમાં રખાઈ રહ્યા નથી તેવી ફરિયાદો થઈ રહી છે. તાજેતરમાં પણ બોર્ડ પરીક્ષાના સમયપત્રકમાં ધુળેટી સમયે પરીક્ષા ગોઠવાઈ હતી. શાંતિપૂર્વક વાતાવરણમાં વિદ્યાર્થીઓ તૈયારી કરી શકે તેવા આયોજનના બદલે મન ફાવે તેમ પરીક્ષા ગોઠવવામાં આવી રહી છે.