ફોરેન પોસ્ટ ઓફિસમાં આવેલા પાર્સલમાંથી ક્રાઈમ બ્રાંચે રૂ. ૩.૪૫ કરોડનું ડ્રગ્સ ઝડપ્યું

ડાર્ક વેબનો ‘કાળો' ખેલઃ વિદેશથી રમકડાં અને ખાદ્યપદાર્થોની આડમાં ડ્રગ્સની દાણચોરી

- 

એમડી ડ્રગ્સ, ચરસ અને હાઈબ્રિડ ગાંજો કેનેડાથી ઓનલાઈન મંગાવવામાં આવ્યાં હતાં

ડાર્ક વેબનો ઉપયોગ કરીને માફિયાઓ વિદેશથી કરોડો રૂપિયાનું ડ્રગ્સ મંગાવી રહ્યા હોવાનો પર્દાફાશ અનેક વખત થયો છે. ડાર્ક વેબની મદદથી માફિયાઓ વિદેશથી રમકડાં તેમજ અન્ય ચીજવસ્તુઓની આડમાં ડ્રગ્સ મંગાવી રહ્યા છે. ક્રાઇમ બ્રાંચની ટીમે ફોરન પોસ્ટ ઓફિસમાંથી અનેક વખત ડ્રગ્સનો જથ્થો જપ્ત કર્યો છે ત્યારે આજે સવારે પણ એક મોટી સફળતા હાથ લાગી છે. ક્રાઇમ બ્રાંચે ૩.૪૫ કરોડ રૂપિયાના ડ્રગ્સનો જથ્થો જપ્ત કર્યો છે. પહેલાં હાઇબ્રિડ ડ્રગ્સ આવતું હતું, પરંતુ હવે એમડી, ચરસ, ગાંજો કુરિયર મારફતે આવ્યો છે.

તહેવારોમાં એક વખત અમદાવાદમાં વિદેશથી આવતું ડ્રગ્સ અમદાવાદ ક્રાઈમ બ્રાન્ચે ઝડપી લીધું છે. આ વખતે ૩.૩૦ કરોડ જેટલી કિંમતનું એમડી ચરસ અને હાઇબ્રિડ ગાંજો રમકડાં અને ખાદ્યપદાર્થની આડમાં ઓનલાઈન મંગાવવામાં આવ્યો હતો, જે અંગેની જાણ થતાં અમદાવાદ ક્રાઈમ બ્રાન્ચની ટીમે રેડ કરીને ફોરેન પોસ્ટ ઓફિસથી આવેલું ડ્રગ્સ ઝડપી લીધું છે. અમદાવાદ ક્રાઈમ બ્રાન્ચને તહેવારો પહેલાં ડ્રગ્સના મોટા જથ્થાને કોઈ રિસીવ કરવા આવે તે પહેલાં કબજે કરાતાં મોટી સફળતા મળી છે.