બે દિવસ સાચવી લેજો: ૧૧-૧૨ માર્ચે અમદાવાદમાં આગઝરતી ગરમી દઝાડશે

હોળી-ધુળેટીના તહેવારો પણ આકરી ગરમી વચ્ચે ઊજવવા પડશેઃ હવામાન વિભાગની આગાહી

- 

અમદાવાદ સહિત રાજ્યભરમાં માર્ચ મહિનાની શરૂઆત સાથે જ આકરી ગરમી પડવાની શરૂઆત થઈ ચૂકી છે. રાજ્યનાં મોટા ભાગનાં શહેરોમાં તો મહત્તમ તાપમાનનો પારો ઊછળીને ૪૦ ડિગ્રી સેલ્સિયસને પણ પાર જવાની ચોંકાવનારી આગાહી કરવામાં આવી છે. માર્ચ મહિનાની મધ્યમાં જ ગુજરાતવાસીઓએ હીટવેવનો સામનો કરવો પડે તેવી સ્થિતિ સર્જાઈ છે. હવામાન વિભાગે અમદાવાદીઓને આગામી બે દિવસ સુધી હીટવેવથી બચવાની અને તબિયત સાચવવા માટે અપીલ કરી છે. ખાસ કરીને આવતી કાલે ૧૧ માર્ચ અને તે પછી ૧૨ માર્ચે અમદાવાદમાં આગઝરતી ગરમી લોકોને દઝાડશે તેવું હવામાન વિભાગે જણાવ્યું છે. આ બંને દિવસ દરમિયાન શહેરનું મહત્તમ તાપમાન ૪૧ ડિગ્રી કે તેનાથી પણ વધુ રહે તેવી સંભાવના છે. હવામાન વિભાગે તો ત્યાં સુધી જણાવ્યું છે કે આ સપ્તાહે આવનારા હોળી અને ધુળેટીના તહેવારો પણ શહેરીજનોએ આકરી ગરમી વચ્ચે જ ઊજવવા પડશે.