'n Nuwe glimlag vir Isabella (10)

Waar sy saam met haar maats op die speelgrond rondhardloop, lyk Isabella de Vries soos enige ander 10-jarige. Kyk jy egter van naderby, sal jy agterkom haar glimlag is nie so breed soos haar maats s'n nie.

- Maretha Swanepoel

Isabella is met emaljehipoplasie gediagnoseer, wat beteken dat die beskermende emalje op haar tande nie behoorlik vorm nie. Haar ma, Bianca, sê die emalje is dun, onewe en plek-plek heeltemal weg. “Haar tande is baie sensitief vir pyn en gaatjies. Sy het as jong kind nie taai vleis geëet of van koue goed gehou nie. Ons het gedink sy is net vol fiemies, maar besef nou haar tande is te sensitief en sy kry seer wanneer sy kou,” sê Bianca.