Uhulumeni ukhuthuza abampofu ngesekisi alidlala ngabokufika

LIYIMBUDANE isekisi eliqhutshwa yiziphathimandla zezwe ngabokufika abaseNingizimu Afrika ngokungemthetho.

- 

Ngisho isiyabhuyabhu sendawo siyazi ukuthi ikhaya yikhaya ngemingcele, igceke, isibaya namasimu. Akekho umzali olala kuthe gengelezi kwakhe ngoba phela ekhaya kukhosela kulo izingane okumele zivikeleke futhi zingancindelwa muntu.

Njengoba uhulumeni sambeka waba ngumnikazi wekhaya lethu esilibiza ngeNingizimu Afrika, uhlulwa yini ukuba nezinseka eziyimvelo kumzali, abeke phambili izingane zakhe? Khaya lini leli okungena kulona nanoma ubani avule ibhodwe aphake, kube vele izingane zalo zibulawa yinkemane? Ngabe uhulumeni ulindele ukuthula noxolo ekhaya uma evumela nofohlile angene achanase egcekeni, azithathele ngisho okuncane okulingene izingane zekhaya, kubangwe imvuthuluka, bese izingane zakhe zincele izithupha?

Kule mihla wonke amazwe ayadingana futhi asingelifihle iqiniso elithi bayadingeka abokufika abayizinjulabuchopho nabawusizo ezweni. Kayikho nenkinga yokuvakashelwa ngabokufika ngaleso sikhathi esibekiwe, bese begoduka. Siyazwelana nababaleke emazweni abo babhaciswa kuleli. Esikulindele ukuthi konke kwenziwe ngohlelo oluhloniphekile futhi kubekwe eqhulwini abantu baseNingizimu Afrika.

NgokukaNgqongqoshe oseHhovisini likaMengameli, uhlelo lokubalwa kwabantu eNingizimu Afrika olubizwa nge-Census lwadla u-R4 billion. Sancengwa ngokubaluleka kwalo ukuthi kumele lwenziwe ukuze lusize uhulumeni ahlele kahle esazi ukuthi bangakanani abantu emiphakathini okumele baphakelwe - ngokwezibalo zalo - izidingo nengqalasizinda. Ufuduko lwabantu bengena ezweni ngaphandle kwemvume lucekela phansi lolu hlelo futhi kasiluboni ulaka lukahulumeni ngalokhu. Kunalokho, sibona eklomelisa ngensada yamalungelo abangene ngokungemthetho kuleli. Kunokuthi akhuze umhlola, uhulumeni ugqugquzela ukuba abafohlile bafukanyelwe yimiphakathi okugcina sekubangwa izinsiza ngoba nakhu phela imikhumiso kayizenele ngisho izintondolo ezivele zisekhaya.