கொய்யா சாகுபடியில் ஆர்வம் காட்டும் விழுப்புரம் மாவட்ட விவசாயிகள்

மருத்துவ குணமிக்க கொய்யா சாகுபடியில் விழுப்புரம் மாவட்ட விவசாயிகள் அதிக ஆர்வம் காட்டி வருகின்றனர்.

- கு. வைத்திலிங்கம்

விழுப்புரம், ஆக.5: குறைந்தது 10 முதல் 15 ஆண்டுகள் வரை தொடர்ந்து வருமானம் கிடைத்தல், அடர்நடவு முறையில் சாகுபடி செய்வதற்கு மானியம், தரிசு நிலங்களில் தொகுப்பாக சாகுபடி செய்வதற்கு முழு மானியம் போன்றவை தோட்டக்கலைத்துறை மூலம் வழங்கப்படுவதே கொய்யா சாகுபடியில் விவசாயிகள் ஆர்வம் காட்டுவதற்கு காரணம்.

விழுப்புரம் மாவட்டத்தில் கோலியனூர், கண்டமங்கலம், மேல்மலையனூர், செஞ்சி, ஒலக்கூர் போன்ற ஒன்றியங்களைச் சேர்ந்த விவசாயிகள் கொய்யா சாகுபடி மேற்கொண்டு வருகின்றனர். மாவட்டத்தில் தற்போது சுமார் 3 ஆயிரம் ஏக்கர் பரப்பளவில் கொய்யா சாகுபடி நடைபெற்று வருகிறது. இங்கு விளைவிக்கப்படும் கொய்யா பழங்கள், விழுப்புரம் மாவட்டத்தில் விற்பனை செய்வது மட்டுமல்லாமல், சென்னை, திருச்சி, புதுக்கோட்டை உள்ளிட்ட பிற மாவட்டங்களுக்கும் விற்பனைக்காக அனுப்பி வைக்கப்படுகின்றன.

தோட்டக்கலைத்துறை உதவி: விழுப்புரம் மாவட்டத்தில் கொய்யா சாகுபடி மேற்கொள்ளும் விவசாயிகளுக்கு கொய்யா பதியம், இடுபொருள்கள் போன்றவை தோட்டக்கலைத்துறை மூலம் வழங்கப்படுகிறது. விவசாயிகளுக்கு அவர்கள் சாகுபடி செய்யும் பரப்பளவுக்கு ஏற்றவாறு பதியத்தை வழங்கும் தோட்டக்கலைத்துறை, அடர் நடவு முறை மேற்கொண்டால் ஹெக்டேருக்கு ரூ.48 ஆயிரம் மானியத்தையும் வழங்கி வருகிறது. மேலும் 10 முதல் 15 ஆண்டுகள் வரை கொய்யா மரங்கள் பலன் தரும் என்பதால் விவசாயிகள் தொடர்ந்து வருவாய் பெற முடியும் எனக் கூறும் தோட்டக்கலைத்துறை, அதற்கான ஆலோசனைகளையும் விவசாயிகளுக்கு தொடர்ந்து வழங்கி வருகிறது.