முடிவுக்கு வருமா பாமக குடும்பச் சண்டை?

பாமக நிறுவனர் டாக்டர் ராமதாஸுக்கும், அவரது மகனும் கட்சியின் தலைவருமான டாக்டர் அன்புமணிக்கும் இடையே நிர்வாகிகள் நியமன விவகாரத்தில் ஏற்கனவே உரசல்கள் நிலவும் வேளையில், புதுச்சேரியில் கடந்த ஆண்டு டிசம்பர் 28-ஆம் தேதி நடந்த புத்தாண்டு சிறப்பு கட்சிப்பொதுக்குழுக் கூட்டத்தில் ராமதாஸ் வெளியிட்ட அறிவிப்பு அந்த மோதலை மேலும் தீவிரமாக்கியது.

- கு.வைத்திலிங்கம்

வீட்டில் தனக்கும் கட்சியில் அன்புமணிக்கும் உதவியாக தனது மகள் வழி பேரனான ப.முகுந்தனை பாட்டாளி இளைஞர் சங்கத்தின் தலைவராக நியமிப்பதாக ராமதாஸ் அறிவித்தபோது அதை மேடையிலேயே கடுமையாக எதிர்த்தார் அன்புமணி.

கடந்த ஏப்ரல் 11-ஆம் தேதி கட்சியின் தலைவர் பொறுப்பை தானே ஏற்பதாகவும் அன்புமணி இனி செயல் தலைவராகவும், ஜி.கே.மணி கௌரவத் தலைவராகவும் இருப்பார் என்றும் அறிவித்தார் ராமதாஸ். இரு தலைவர்களும் தைலாபுரத்திலும் பனையூரிலும் தனித்தனியாக போட்டிக் கூட்டங்களை நடத்தினர்.

டாக்டர் ராமதாஸ், மாவட்டச் செயலர்கள், மாவட்டத் தலைவர்கள் கூட்டத்தையும், இளைஞரணி, மகளிரணி, மாணவரணி கூட்டங்களை யும், தொடர்ந்து வன்னியர் சங்கம், சமூக ஊடக நிர்வாகிகள் கூட்டம் உள்ளிட்ட பல்வேறு பிரிவுகளின் கூட்டங்களை நடத்தினார். அவற்றில் பெரும்பாலான நிர்வாகிகள் பங்கேற்கவில்லை.

இந்த நிலையில், தைலாபுரம் தோட்டத்தில் மே 29-ஆம் தேதி செய்தியாளர்களை சந்தித்த ராமதாஸ், ‘வளர்த்த கிடாவே மார்பில் உதைத்துவிட்டது’ என்று அன்புமணியை விமர்சித்து குற்றச்சாட்டுக்களை அடுக்கினார். 35 வயதில் அன்புமணியை மத்திய கேபினட் அமைச்சராக்கி தவறு செய்தேன். மத்திய அமைச்சரவையில் அவருக்காக கடுமையாகப் போராடி சுகாதாரத் துறை கிடைக்கச் செய்தேன் என்றும் கூறினார்.

மேலும், ஜி.கே. மணியின் மகன் தமிழ்க்குமரனை இளைஞர் சங்கத் தலைவராக நியமித்தபோது, கட்சியின் நிர்வாகக் குழுக் கூட்டத்தில் நடந்த சம்பவங்கள், தருமபுரி, சேலம் மாவட்டங்களில் கட்சி நிகழ்வுகளில் பங்கேற்க சென்றபோது தனக்கு அன்புமணி விதித்த கட்டுப்பாடுகள், 2024 மக்களவைத் தேர்தலில் அதிமுக கூட்டணியில் சேரத் தயாராக இருந்தபோது, பாஜக அணியில் சேர நிர்பந்தித்தார் அன்புமணி என்று புகார்களை அடுக்கினார் ராமதாஸ்.