அரசு ஊழியர்களுக்கான மருத்துவக் காப்பீடு: கட்டணமில்லா சேவையை உறுதி செய்ய வேண்டும்

அரசு ஊழியர்களுக்கான மருத்துவக் காப்பீடுத் திட்டம் மூலம் கட்டணமில்லா சேவை உறுதி செய்யப்பட வேண்டும் என சென்னை உயர்நீதிமன்ற மதுரை அமர்வு புதன்கிழமை உத்தரவிட்டது.

- 

மதுரையைச் சேர்ந்த காவல் துறை தலைமைக் காவலர் ரவி சென்னை உயர்நீதிமன்ற மதுரை அமர்வில் தாக்கல் செய்த மனு:

மதுரையில் உள்ள தனியார் மருத்துவமனையில் மாநில அரசின் புதிய மருத்துவக் காப்பீட்டுத் திட்டத்தின் கீழ் இருதய சிகிச்சை பெற்றேன். இந்தச் சிகிச்சைக்கு ரூ. 3.73 லட்சம் செலவானது. இதில் ரூ. 1.01 லட்சத்தை மட்டுமே காப்பீட்டு நிறுவனம் வழங்கியது. மீதமுள்ள தொகையையும் காப்பீட்டு நிறுவனம் வழங்க உத்தரவிட வேண்டும் என அவர் கோரினார்.

இந்த மனுவை புதன்கிழமை விசாரித்த உயர்நீதிமன்ற நீதிபதி பி. புகழேந்தி பிறப்பித்த உத்தரவு:

அரசு ஊழியர்கள் பொது நிர்வாகத்தின் முதுகெலும்பாகக் கருதப்படுவர். அரசு ஊழியர்கள் தங்களுக்கும், தங்களைச் சார்ந்தவர்களின் மருத்துவ அவசரத் தேவைகளுக்காகவும் நிதிச் சுமைக்கு உள்ளாகக் கூடாது என்ற நோக்கத்திலேயே மருத்துவக் காப்பீட்டுத் திட்டங்கள் செயல்படுத்தப்படுகின்றன.