சேலம் மாவட்டத்தில் 2 ஆண்டுகளாக பாக்கு மகசூல் பாதிப்பு!

எடைபோட்டு கொள்முதல் செய்ய வியாபாரிகள் முடிவு

- பெ.பெரியார்மன்னன்

வாழப்பாடி, ஜூன் 7: சேலம் மாவட்டத்தில் தொடர்ந்து இரு ஆண்டுகளாக பாக்கு மகசூல் பாதிப்பு மற்றும் விலை வீழ்ச்சியால், ஆண்டு குத்தகை முறையில் மகசூல் உரிமம் பெற்று கொட்டைப்பாக்கு வணிகம் செய்து வரும் வியாபாரிகளுக்கு பெருமளவில் இழப்பு ஏற்பட்டுள்ளதால் அவர்கள் கவலை அடைந்துள்ளனர். இதனால் ஆண்டு குத்தகை முறையை கைவிட்டு, மற்ற காய்கறிபோல, பாக்குக்காய்களையும் எடை போட்டு கொள்முதல் செய்த வியாபாரிகள் பலரும் முடிவு செய்துள்ளனர்.

சேலம் மாவட்டத்தில் வாழப்பாடி, பெத்தநாயக்கன்பாளையம், தலைவாசல் அயோத்தியாப்பட்டணம், நரசிங்கபுரம், ஏத்தாப்பூர், பேளூர், கருமந்துறை, தம்மம்பட்டி, கெங்கவல்லி பகுதியில், நீர்ப்பாசன வசதி கொண்ட விவசாயிகள், 30 ஆண்டுகளுக்கும் மேலாக 10,000 ஹெக்டேரில் பாக்கு மரத்தோப்புகளை உருவாக்கி தொடர்ந்து பராமரித்து வருகின்றனர்.

சேலம் மாவட்டத்தில் மட்டுமின்றி, நாமக்கல் மாவட்டம் கொல்லிமலை அடிவாரம் காரவள்ளி, சேந்தமங்கலம், பேளூக்குறிச்சி, பெரம்பலூர் மாவட்டம் அரும்பாவூர், பூலாம்பாடி, தருமபுரி மாவட்டம் அரூர், பாப்பிரெட்டிப்பட்டி, கோட்டப்பட்டி பகுதிகளிலும், கடந்த 20 ஆண்டுகளில் 5,000 ஹெக்டேரில் பாக்கு மரத்தோப்புகள் உருவாகியுள்ளன.