யாரும் எதிர்பார்க்காத வகையில் போட்டிப்போட்டு ஒரே ஆண்டில் வெள்ளி விலை கிலோவுக்கு ரூ.1.87 லட்சம் உயர்ந்தது

தங்கமும் பவுனுக்கு ரூ.47600 எகிறி வரலாற்று உச்சம்

- 

வெள்ளி விலை யாரும் எதிர்பார்க்காத வகையில் போட்டி போட்டு ஒரே ஆண்டில் கிலோவுக்கு ரூ.1.87 லட்சம் உயர்ந்துள்ளது. இதேபோல, தங்கமும் பவுனுக்கு ரூ.47,600 உயர்ந்து கடும் அதிர்ச்சியை ஏற்படுத்தியுள்ளது.

தங்கம் விலை கடந்த 15ம் தேதி ஒரு பவுன் ரூ.1 லட்சத்தை தாண்டி வரலாற்றை திரும்பி பார்க்க வைத்தது. தங்கத்திற்கு போட்டியாக வெள்ளி விலையும் தாறுமாறாக உயர தொடங்கியது. கடந்த 15ம் தேதி மட்டும் பார் வெள்ளி ரூ.2.15 லட்சத்துக்கு விற்பனையானது.

நேற்று முன்தினம் தங்கம் விலை கிராமுக்கு ரூ.70 உயர்ந்து ஒரு கிராம் ரூ.12,890க்கும், பவுனுக்கு ரூ.560 உயர்ந்து ஒரு பவுன் ஒரு லட்சத்து 3120க்கும் விற்பனையானது. வெள்ளியும் கிராமுக்கு 9 ரூபாய் உயர்ந்து ஒரு கிராம் வெள்ளி ரூ.254க்கும், கிலோவுக்கு ரூ.9 ஆயிரம் உயர்ந்து பார் வெள்ளி 2 லட்சத்து 54 ஆயிரம் ரூபாய்க்கும் விற்றது.

தங்கம் விலை நேற்று காலை கிராமுக்கு ரூ.110 அதிகரித்து ஒரு கிராம் ரூ.13,000க்கும், பவுனுக்கு ரூ.880 அதிகரித்து, ஒரு பவுன் 1,04,000க்கும் விற்றது. வெள்ளி விலை கிராமுக்கு ரூ.20 அதிகரித்து ஒரு கிராம் ரூ.274க்கும், கிலோவுக்கு ரூ.20 ஆயிரம் அதிகரித்து, பார் வெள்ளி ரூ.2,74,000க்கும் விற்பனையானது.