Hyderus o effeithiau llesol ffair fasnach

AE cyfanwerthwr bwyd 0 Ogledd Cymru yn rhagweld gwerthiant o £3 miliwn mewn ffair fasnach fawr fis nesaf

- 

Dywed Gwasanaeth Bwyd Harlech y gallai Expo 26 a gynhelir dros ddeuddydd yn Venue Cymru yn Llandudno dorri pob record flaenorol ar ôl i ddigwyddiad y llynedd ddenu £1.5 miliwn mewn archebion.

Mae'r cwmni teuluol sy'n ehangu'n gyflym yn credu y gallai hynny ddyblu eto gyda disgwyl i hyd at 3,000 o brynwyr fynd trwy'r drysau ar Fawrth 11 a 12.

Ymhlith y cwsmeriaid bydd cynrychiolwyr o sefydliadau mawr yn y sectorau gofal iechyd ac addysg cyhoeddus a phreifat, ynghyd â'r diwydiant twristiaeth a lletygarwch.

Daw ar ôl dwy flynedd o dwf cyflym i'r cwmni sydd â'i bencadlys yng Ngwynedd ond sydd wedi ychwanegu canolfannau newydd yng Nghaerfyrddin, Caerffili a Telford i'w ganolfannau hir sefydlog yng Nghricieth a Chaer.

Eisoes mae 115 o gyflenwyr wedi archebu stondin yn y ffair fasnach gan gynnwys cwmni mawr rhyngwladol y diwydiant bwyd a diod fel Coca-Cola, Pepsi, Kellogg's, Premier Foods, Cadbury's, Nestle, Kelly's Ice Cream, Walkers Crisps ac Unilever.

Yn ymuno â nhw bydd brandiau Cymreig adnabyddus fel Jones, Village Bakery, Llaeth y Llan, Radnor Spring, hufen iâ Sidolis, Coffi Ferraris a hefyd cwmnïau bwyd o ardal y ffin fel Cheshire Farm Ice Cream, Purity Soft Drinks o Wednesbury a Cottom Sausages o Lerpwl.

Mae Gwasanaeth Bwyd Harlech hefyd newydd symud i faes busnes ffrwythau a llysiau ffres a bydd y cwmni'n arddangos ei gynnyrch mewn hwb arbennig yng nghanol y neuadd arddangos yn Venue Cymru a fydd hefyd yn cynnwys cynnig cigyddiaeth newydd y cwmni a hefyd cynnyrch Country Range sef brand Harlech ei hun.

Toby Foskett, wyr i sylfaenwyr cwmni Harlech, Colin a Gill Foskett a'r drydedd genhedlaeth o'r teulu i symud i'r busnes, yw'r Rheolwr Categori ar gyfer Ffrwythau, Llysiau a Chigyddiaeth.