తిరుమలకొండపై పచ్చదనాన్ని మరింత పెంచుతాం

టీటీడీ చైర్మన్ బీ.ఆర్.నాయుడు, టీటీడీ ఈవో జె.శ్యామలరావు

- 

తిరుపతి-ఆంధ్రనాడు, మే 20: తిరుపతిలోని స్విమ్స్ ఆసుపత్రి నిర్వహణ కోసం ప్రస్తుతం కేటాయిస్తున్న 60 కోట్లతో పాటు ఇకపై అదనంగా 71 కోట్ల రూపాయల అంటే మొత్తం 131 కోట్లు నిధులు కేటాయించడానికి టిటిడి ధర్మకర్తల మండలి పచ్చ జెండా ఊపింది. ఈ ఆసుపత్రి అభివృద్ధి కోసం టిటిడి నియమించిన విశ్రాంత ఐఏఎస్ అధికారి ఐ వి సుబ్బారావు అధ్యయనం చేసి అందించిన నివేదిక మేరకు గవర్నమెంట్ కౌన్సిల్ ఆమోదం తెలియజేసిన నేపథ్యంలో టీటీడీ బోర్డు సమావేశం ఈ నిర్ణయం తెలియజేసింది. ఆసుపత్రుల నిర్వహణ కూడా పేద ప్రజల వైద్యం కోసం ఉన్నందున మానవసేవయే మాధవ సేవగా భావించి స్విమ్స్ ఆసుపత్రి నిర్వహణ మరింత సమర్థవంతంగా చేపట్టాలని ఈ నిర్ణయం తీసుకున్నారు. తిరుమలలోని అన్నమయ్య భవన్ లో మంగళవారం ఉదయం టీటీటీ ధర్మకర్తల మండలి సమావేశం జరిగింది. టీటీడీ చైర్మన్ బీ.ఆర్.నాయుడు అధ్యక్షతన నిర్వహించిన సమావేశంలో ధర్మకర్తల మండలి పలు ముఖ్యమైన నిర్ణయాలు తీసుకుంది. ఈ వివరాలను టీటీడీ ఈవో జె. శ్యామలరావు మీడియాకు వివరించారు. టీటీడీ ధర్మకర్తల మండలి సమావేశంలో ముఖ్య నిర్ణయాలు వాటి వివరాలు ఇలా ఉన్నాయి.

రాష్ట్ర ముఖ్యమంత్రి నారా చంద్రబాబు నాయుడు ఆదేశాల మేరకు తిరుమల కొండల్లో ఉన్న పచ్చదనాన్ని అటవీశాఖ ద్వారా 68.14 శాతం నుండి 80 శాతానికి పెంచేందుకు నిర్ణయం. ప్రభుత్వ ఆమోదం వచ్చాక దశలవారీగా 2025 26 సంవత్సరంలో రూ.1.74కోట్లు, 2026-27 సంవత్సరంలో రూ.1.13కోట్లు, 2027-28 సంవత్సరానికి రూ.1.13కోట్లు ప్రభుత్వ అటవీశాఖకు విడుదల చేసేందుకు నిర్ణయం.

తిరుచానూరు పద్మావతి అమ్మవారి ఆలయం, అమరావతి వేంకటేశ్వరస్వామి ఆలయం, నారాయణవనం కళ్యాణ వేంకటేశ్వరస్వామి ఆలయం, కపిలతీర్థం కపిలేశ్వరస్వామి ఆలయం, నాగాలాపురం వేదనారాయణస్వామి ఆలయం, ఒంటిమిట్ట కోదండరామ స్వామి ఆలయాల అభివృద్ధి కోసం సమగ్ర బృహత్ ప్రణాళిక తయారు చేసేందుకు ఆర్కిటెక్ట్ ల నుండి సాంకేతిక, ఆర్థిక ప్రతిపాదనలు స్వీకరించాలని నిర్ణయం.