સેવા-સમર્પણ-શ્રદ્ધાનો ઓચ્છવ...

બીએપીએસ કાર્યકર સુવર્ણ મહોત્સવ અમદાવાદના નરેન્દ્ર મોદી સ્ટેડિયમમાં BAPS સ્વામિનારાયણ સંસ્થાએ ન ભૂતો ન ભવિષ્યતિ એવો ‘કાર્યકર સુવર્ણ મહોત્સવ’ યોજી ઈતિહાસ રચ્યો. સવા ચાર કલાક ચાલેલા આ કાર્યક્રમના મૂળમાં હતો નિઃસ્વાર્થભાવે સેવા કરતા સંસ્થાના સંનિષ્ઠ કાર્યકરોનો ઋણસ્વીકાર. આ ઐતિહાસિક કાર્યક્રમમાં દેશ-વિદેશથી એક લાખથી વધુ કાર્યકરોએ ઉમળકાભેર ભાગ લીધો.

- હેતલ રાવ (અમદાવાદ)

એક લાખથી વધુની મેદનીથી હકડેઠઠ ભરાયેલા અમદાવાદના નરેન્દ્ર મોદી સ્ટેડિયમમાં એ સાંજે અધ્યાત્મ અને અત્યાધુનિક ટેક્નોલૉજીના સુભગ સમન્વય અને ભાતીગળ સાંસ્કૃતિક કાર્યક્રમોથી જાણે ધરતી પર સ્વર્ગ ઊતરી આવ્યું હતું. વાત છે સાત ડિસેમ્બરે અહીં યોજાઈ ગયેલા કાર્યકર સુવર્ણ મહોત્સવની.

બીએપીએસ એની વિવિધ આધ્યાત્મિક-સામાજિક પ્રવૃત્તિ માટે જાણીતી છે. સંસ્થાની અનેકવિધ પ્રવૃત્તિઓને એક નવી ઊંચાઈએ લઈ જાય છે એના કર્મઠ કાર્યકરો અને એ દિવસે એ કાર્યકરોને જ પોંખવાનો અવસર હતો. તો આ જ દિવસે ભગવાન સ્વામિનારાયણની ગુણાતીત ગુરુપરંપરાના પાંચમા ગુરુદેવ પ્રમુખ સ્વામીનો ૧૦૩મો જન્મદિવસનો ઉલ્લાસ પણ હતો.

પ્રમુખ સ્વામીના ગુરુ તથા બોચાસણવાસી શ્રી અક્ષર પુરુષોત્તમ સંસ્થા (બીએપીએસ)ના સ્થાપક શાસ્ત્રી મહારાજે સંસ્થા પાસે કટિબદ્ધ કાર્યકરો હોય એ વિચાર વહેતો મૂક્યો હતો. એમના બાદ આવેલા યોગીજી મહારાજે આ વિચારને નક્કર સ્વરૂપ આપ્યું, જ્યારે પ્રમુખ સ્વામીએ એમને (કાર્યકરોને) ઈન્સ્ટિટ્યુલાઈઝ કર્યા. ૧૯૭૨માં પ્રમુખ સ્વામી મહારાજે કાર્યકર્તાઓને સંગઠિત કર્યા એ પછી ૧૯૭૦ના દાયકામાં આવેલી મોરબી-મચ્છુ ડેમ દુર્ઘટનાથી લઈને લાતુર અને કચ્છ ભૂકંપ, સુનામી જેવી કુદરતી હોનારતોમાં તથા દેશ-દુનિયાનાં મંદિરોમાં, સંસ્થાના મહોત્સવમાં આ કાર્યકરો સેવા આપી રહ્યા છે.

સમ્માન અને ઋણસ્વીકારના અધિકારી એવા 'બીએપીએસ’ના એક લાખ જેટલા કાર્યકરોને વધાવવા બે હજાર જેટલાં બાળકોએ રજૂ કર્યો ‘બીજ, વૃક્ષ અને ફળ’ના થીમ આધારિત કાર્યક્રમ, જેના અંતે થઈ ખેલ મહોત્સવ જેવી આતશબાજી.

આ મહોત્સવમાં મહંત સ્વામી સહિત BAPSના અગ્રણી સંતોએ હાજરી આપી તથા દેશના ગૃહપ્રધાન અમિત શાહ, ગુજરાતના મુખ્ય પ્રધાન ભૂપેન્દ્ર પટેલ તથા અન્ય પ્રધાનોએ હાજરી આપી, જ્યારે વડા પ્રધાન નરેન્દ્ર મોદીએ વિડિયો સંદેશ પાઠવ્યો. એટલું જ નહીં, કાર્યક્રમમાં ૨૦૦૦થી વધુ બાળકોયુવાનોએ વિવિધ કળાની પ્રસ્તુતિ કરી. કાર્યક્રમને સુખરૂપ પાર પાડવા ૧૦,૦૦૦થી વધુ સ્વયંસેવકો ખડે પગે રહ્યા.