કેવું સ્માર્ટ (સિટી) બન્યું છે અમદાવાદ?

લોકસભા ચૂંટણી માથે આવી છે ત્યારે વડા પ્રધાન નરેન્દ્ર મોદીના મહત્ત્વાકાંક્ષી ‘સ્માર્ટ સિટી’ પ્રોજેક્ટ અંતર્ગત કર્ણાવતી નગરીનો દેખાવ કેવો રહ્યો છે એનો લઈએ ચિતાર.

- મહેશ શાહ (અમદાવાદ)

ગુજરાતના ઐતિહાસિક શહેર અમદાવાદને અનેકવિધ પ્રવૃત્તિમાં સફળતાસિદ્ધિ બદલ એવૉર્ડ-પુરસ્કાર મળ્યા. થોડાં વર્ષથી અમદાવાદની આગવી ઓળખ બનીઃ વર્લ્ડ હેરિટેજ સિટી... સ્માર્ટ સિટી.

સ્માર્ટ સિટી તરીકે પણ અમદાવાદને છ વર્ષમાં ૩૪ એવૉર્ડ-સમ્માન મળ્યાં. એમાં નોંધપાત્ર ગણો તો વડા પ્રધાન નરેન્દ્ર મોદી અને રાષ્ટ્રપ્રમુખ દ્રૌપદી મુર્મુના હસ્તે પણ એવૉર્ડ મળ્યા. બન્ને મહાનુભાવના હસ્તે સમ્માન મેળવનારું દેશનું પ્રથમ સ્માર્ટ સિટી અમદાવાદ.

દેશમાં સ્માર્ટ સિટી બનાવવાનો મહત્ત્વાકાંક્ષી પ્રોજેક્ટ વડા પ્રધાન નરેન્દ્ર મોદીનો છે. એમણે વિદેશનાં અદ્યતન સુવિધાયુક્ત મહાનગરોની જેમ દેશમાં પસંદગીનાં શહેરોને વિકસાવીને નાગરિક સુવિધા સરળ, સુગમ અને પરિણામદાયી બનાવવા તથા દેશના આર્થિક વિકાસમાં યોગદાન આપવા ૨૫ જૂન, ૨૦૧૫ના રોજ સ્માર્ટ સિટી મિશન લૉન્ચ કર્યું. પ્રથમ ચરણમાં જાન્યુઆરી, ૨૦૧૬એ જાહેર કરેલાં વીસ સ્માર્ટ સિટીમાં ગુજરાતના એકમાત્ર અમદાવાદનો સમાવેશ થયો. પછી ઉમેરાયાં ગુજરાતનાં વધુ પાંચ શહેરઃ વડોદરા, રાજકોટ, સુરત, ગાંધીનગર અને દાહોદ. એમાં સ્માર્ટ સિટી અમદાવાદને નામના મળી. આવો, કરીએ ગુજરાતના પ્રથમ સ્માર્ટ સિટીની સફર.

| અમદાવાદની સિટી બસમાં મૂકેલા કૅમેરા, બસ પસાર થાય એ રસ્તા પર રખડતાં ઢોર, ઊભરાતી કચરાપેટી, ખાડા, હેલ્મેટ વગરના

અંદાજે ૪૮૦ ચોરસ કિલોમીટર વિસ્તાર અને સિત્તેર લાખની વસતિ ધરાવતા અમદાવાદને અમદાવાદ મ્યુનિસિપલ કૉર્પોરેશને (એએમસીએ) સાત ઝોન અને ૪૮ વૉર્ડમાં વિભાજિત કર્યું તથા શહેરને સ્માર્ટ સિટી બનાવવા વર્ષ ૨૦૧૬માં સ્માર્ટ સિટી અમદાવાદ ડેવલપમેન્ટ લિમિટેડ કંપની સ્થાપીને સેફ ઍન્ડ સિક્યોર અમદાવાદ અંતર્ગત પાલડી ખાતે પંદર કરોડના ખર્ચે આંતરરાષ્ટ્રીય કક્ષાનું કમાન્ડ ઍન્ડ કન્ટ્રોલ સેન્ટર સાથેનું નવું ભવન બનાવ્યું. ૨૦૧૮માં ગુજરાતના તત્કાલીન મુખ્ય મંત્રી તત્કાલીન મુખ્ય મંત્રી વિજય રૂપાણીએ એનું લોકાર્પણ કર્યું હતું.