പ്രവാസം അവസാനിപ്പിക്കും മുൻപ് പരിശോധിക്കാൻ ഇതാ ഒരു ചെക്ലിസ്റ്റ്

തിരിച്ചെത്തുമ്പോൾ പ്രതീക്ഷിക്കുന്ന സുഖജീവിതം വെറും സ്വപ്നമായി ചുരുങ്ങാതിരിക്കാൻ ശരിയായ പ്ലാനിങ് നടത്തണം.

- അനൂജ് ശശീന്ദ്രൻ

കുവൈത്തിൽ 25 വർഷം ഉയർന്ന ശമ്പളത്തിൽ ജോലിചെയ്ത നാസർ നാട്ടിലേക്കു മടങ്ങാൻ തീരുമാനിച്ചു. കണ്ട സ്വപ്നങ്ങളെല്ലാം സാക്ഷാൽക്കരിക്കാൻ ജീവിതത്തിന്റെ ഭൂരിഭാഗവും ഗൾഫിൽ ചെലവഴിച്ച അദ്ദേഹം, ലക്ഷ്യങ്ങളെല്ലാം നേടിയെന്നു വിശ്വസിച്ചാണ് മടങ്ങാൻ തീരുമാനിച്ചത്.

ശിഷ്ടകാലം കുടുംബത്തോടൊപ്പം സന്തോഷകരമായി ജീവിക്കാനും സ്വയം "എൻഗേജ്ഡ്' ആകാനും വേണ്ടി ഒരു ചെറിയ ബിസിനസ് തുടങ്ങാം എന്ന പ്ലാനുമായാണ് അദ്ദേഹം മടങ്ങിയത്.

എന്നാൽ ഒരു വർഷത്തിനുള്ളിൽ പല യാഥാർഥ്യങ്ങളും അദ്ദേഹം തിരിച്ചറിഞ്ഞുതുടങ്ങി.

ഇപ്പോഴുള്ള സമ്പാദ്യം ശിഷ്ടകാലം ജീവിക്കാൻ മതിയാകും എന്ന ധാരണയാണ് നാസറിനുണ്ടായിരുന്നത്. ആകെ ഉണ്ടായിരുന്നത് കുറച്ചു ബാങ്ക് നിക്ഷേപങ്ങളും ഇൻഷുറൻസ് പോളിസികളുമായിരുന്നു. കൂടാതെ കുറച്ചു ഭൂമിയും വീടിന് അൽപം ദൂരെയായി വാങ്ങിയിരുന്നു. സ്വയം ഒന്നു വിലയിരുത്തിയപ്പോൾ ആവശ്യത്തിന് ആസ്തിയുള്ളതായി തോന്നി.

എന്നാൽ അദ്ദേഹത്തിനില്ലാതെ പോയത് സ്ഥിരമായ പ്രതിമാസ വരുമാനമായിരുന്നു. ഒരിക്കലും അതിനായി ആസൂത്രണം ചെയ്തിരുന്നില്ല എന്നതാണ് വസ്തുത. പെൻഷൻ ഇല്ല, വാടക വരുമാനമില്ല. മ്യൂച്വൽ ഫണ്ട് -ഓഹരികളുടെ ലാഭവിഹിതവുമില്ല. ഉള്ളതാകട്ടെ മാസം ലഭിക്കുന്ന തുച്ഛമായ ബാങ്കു പലിശ മാത്രം. അതു വീട്ടുചെലവിനുപോലും തികയില്ല. പെട്ടെന്നു ചെലവു ചുരുക്കാൻ വീട്ടുകാരോട് ആവശ്യപ്പെടാൻ അദ്ദേഹത്തിന്റെ അഭിമാനമൊട്ട് അനുവദിച്ചുമില്ല.

നാട്ടിലെ ചികിത്സാച്ചെലവുകൾ സങ്കൽപിച്ചതിനെക്കാൾ വളരെ കൂടുതലായിരുന്നു. മുതിർന്നവർക്കു വേണ്ടിവന്ന ചെറിയ ആശുപത്രി ആവശ്യങ്ങൾക്കു പോലും വലിയ തുക ചെലവായി. അതും സ്വന്തം പോക്കറ്റിൽനിന്നുതന്നെ എടുക്കേണ്ട അവസ്ഥ.