കളറാക്കാം പവർഫുള്ളാക്കാം മക്കളുടെ ഭാവി

മക്കൾക്കായുള്ള നിക്ഷേപം ഈ അബദ്ധങ്ങൾ നിങ്ങൾക്കു പറ്റരുത്

- രാജശ്രീ എസ്.

സ്വന്തം ജീവിതത്തിലെ ഏറ്റവും വലിയ സമ്പത്ത് മക്കളാണ് എന്നു കരുതുന്നവരാണ് ഭൂരിഭാഗം മലയാളികളും. കുട്ടികൾക്ക് ഏറ്റവും മികച്ച പഠനവും ഭാവിയും ഉറപ്പാക്കാനായി കഴിയുന്നത് പണം സമാഹരിക്കാനുള്ള ശ്രമങ്ങൾ കുഞ്ഞു പിറക്കുമ്പോൾ തന്നെ തുടങ്ങുകയും ചെയ്യും.

പക്ഷേ, അത്തരം നിക്ഷേപങ്ങൾ ആവശ്യമുള്ള സമയത്തു ശരിയായി ഉപയോഗപ്പെടാതെ പോകുന്ന അവസ്ഥ പലർക്കും വരാറുണ്ട്. ശരിയായ പദ്ധതി കണ്ടെത്തി നേരത്തെ നിക്ഷേപം തുടങ്ങുന്നതടക്കം ചില കാര്യങ്ങൾ ശ്രദ്ധിച്ചാൽ നിങ്ങൾക്ക് അവ ഒഴിവാക്കാനാകും. മാത്രമല്ല, ആവശ്യത്തിലധികം പണം ഉറപ്പാക്കിയതുകൊണ്ട് മക്കളുടെ ഭാവി സുരക്ഷിതവും സന്തോഷവും നിറഞ്ഞതാകില്ലെന്ന യാഥാർഥ്യംകൂടി മാതാപിതാക്കൾ അറിയണം.

അതിനുള്ള പണം നന്നായി കൈകാര്യം ചെയ്യാനടക്കം പലതും ബാല്യത്തിൽ തന്നെ അവരെ പരിശീലിപ്പിക്കണം. സമൂഹത്തിൽ സന്തോഷത്തോടെ ഇടപെടാനും പ്രശ്നങ്ങൾ തരണം ചെയ്യാനും ശാരീരികവും മാനസികവുമായ ആരോഗ്യം ഉറപ്പാക്കാനും ആത്മവിശ്വാസത്തോടെ സ്വന്തംകാലിൽ നിൽക്കാനും അവരെ പഠിപ്പിക്കാൻ നിങ്ങൾക്കേ കഴിയൂ. അതു ചെയ്താൽ മക്കൾ പവർ ഫുള്ളാകും, അവരുടെ ഭാവി കളറാകും. അത്തരം ഒരു ജീവിതം തങ്ങൾക്കു നേടിത്തന്ന മാതാപിതാക്കളെ അവർ എന്നെന്നും സ്നേഹിക്കും. അതു നിങ്ങളുടെ വാർധക്യ ജീവിതത്തിലും സമാധാനം നിറയ്ക്കും. അതിനുള്ള ചില നിർദേശങ്ങളാണ് ഇത്തവണ കവർ സ്റ്റോറിയിൽ.

സമയത്ത് പണം കിട്ടില്ല

മാസം കിട്ടുന്ന 30,000 രൂപയിൽനിന്ന് 5,000 രൂപ വിതം മനോജ് കുമാർ നിക്ഷേപിച്ചത് മകളുടെ പഠനത്തിനുള്ള പണത്തിന് ഓടി നടക്കേണ്ടിവരരുത് എന്നുറപ്പിച്ചാണ്. പെൺകുട്ടിയുടെ ഭാവി ആവശ്യങ്ങൾക്ക് ഉയർന്ന പലിശയും സർക്കാർ ഗാരന്റിയുമുള്ള മികച്ച നിക്ഷേപമായ സുകന്യ സമൃദ്ധി യോജനയിൽ ഏഴു വയസ്സുകാരിയുടെ പേരിൽ നിക്ഷേപവും ആരംഭിച്ചു. ഇഷ്ടകോഴ്സിന് അടുത്ത വർഷം അഡ്മിഷൻ എടുക്കേണ്ടതിനാൽ എത്ര രൂപ കിട്ടും എന്ന് ഈയിടെ അന്വേഷിച്ചപ്പോഴാണ് മനോജ് ഞെട്ടിയത്. അക്കൗണ്ടിൽ പലിശയടക്കം ഒൻപതു ലക്ഷത്തിലധികം രൂപയുണ്ടെങ്കിലും 4.5 ലക്ഷമേ എടുക്കാനാകൂ. കൃത്യമായി പ്ലാൻ ചെയ്തിട്ടും മൊത്തം നിക്ഷേപിച്ച ആറു ലക്ഷം രൂപപോലും എടുക്കാനാകില്ല.

പോളിസിയിലെ കുരുക്ക്