വാനിലെ താരം

COMPANY HISTORY

- സുബിൻ ബാലൻ

രണ്ടാം ലോകയുദ്ധാനന്തരം ലോക വിപണിയിൽ മുൻ നിരയിലേക്കു വന്ന വിമാന കമ്പനികൾ അമേരിക്കയിൽ നിന്നുള്ളവയായിരുന്നു. ബോയിങ്ങും ലോക്ക്ഹീഡുമെല്ലാമാണ് ആകാശം ഭരിച്ചത്. സാങ്കേതികമായി മികവു കാണിച്ചെങ്കിലും യൂറോപ്യൻ വ്യേമയാന കമ്പനികൾ പിന്നിലേക്കു പോയി. 1960കളിൽ പല യൂറോപ്യൻ കമ്പനികളും മികച്ച വിമാനങ്ങളുടെ ഡിസൈനുകൾ അവതരിപ്പിച്ചെങ്കിലും പ്രൊഡക്ഷൻ മോഡലായി അവതരിപ്പിക്കാനുള്ള ധൈര്യമില്ലാതെ പോയി. യൂറോപ്യൻ വ്യോമയാന കമ്പനികളെ അമേരിക്കയുടെ ബോയിങ്ങും ലോക്ക്ഹീഡുമെല്ലാം വിഴുങ്ങുമെന്ന നിലവന്നു. ഈ സ്ഥിതി മറി കടക്കാൻ നാലു യൂറോപ്യൻ രാജ്യങ്ങളിലെ വ്യത്യസ്ത കമ്പനികൾ ചേർന്ന് വിമാനങ്ങൾ നിർമിക്കാൻ തീരുമാനമെടുത്തു. ദേശങ്ങളുടെ അതിർത്തി മറികടന്നുണ്ടായ ആ കൂട്ടായ്മയാണ് എയർബസായി മാറുന്നത്. തൊട്ടതെല്ലാം പൊന്നാക്കിയവരായിരുന്നില്ല എയർബസ്. സാധ്യതകളെ തിരിച്ചറിഞ്ഞ് വിപണിയിൽ ഇടപെട്ട് പിഴവിൽനിന്നു പാഠം പഠിച്ചു മുന്നേറി. അങ്ങനെ പ്രായോഗികതയും സാങ്കേതികമികവുംകൊണ്ട് ഇന്ന് ലോകത്തെ ഏറ്റവും വലിയ വ്യോമയാന കമ്പനിയായി മാറിയ കഥയാണ് എയർബസിനു പറയാനുള്ളത്.

എയർബസിന്റെ പിറവി

യൂറോപ്യൻ കമ്പനികൾ സാങ്കേതികമായി മുന്നിലായിരുന്നെങ്കിലും ലോകമാകെ വിജ യിച്ച വിമാനങ്ങൾ നിർമിക്കാൻ അവർക്കു സാധിച്ചിരുന്നില്ല. വലിയ ആഭ്യന്തര വിപണി അടക്കമുള്ള ഒട്ടേറെ കാര്യങ്ങൾ അമേരിക്കൻ കമ്പനികൾക്ക് അനുകൂലമായിരുന്നു. യൂറോപ്യൻ കമ്പനികളാവട്ടെ 1965 വരെ പല വലിയ വിമാനങ്ങളുടെയും ഡിസൈനുകൾ പുറത്തു വിട്ടെങ്കിലും അതു നിർമിച്ചു വിപണിയിലെത്തിക്കാനുള്ള സാഹസത്തിനു മുതിർന്നില്ല. ദീർഘദൂരം സഞ്ചരിക്കാവുന്ന, കൂടുതൽ പേരെ ഉൾക്കൊള്ളാനാവുന്ന വിമാനങ്ങൾ നിർമിക്കാൻ 1965ൽ ഫ്രാൻസും പശ്ചിമ ജർമനിയും ചർച്ചകൾ തുടങ്ങിയതോടെയാണ് എയർബസ് പദ്ധതി സജീവമാവുന്നത്. ആ വർഷം നടന്ന പാരിസ് എയർ ഷോയ്ക്കിടയിലും യൂറോപ്യൻ വ്യോമയാന കമ്പനിയെക്കുറിച്ചുള്ള ചർച്ചകൾ സജീവമായി.

ആദ്യഘട്ടത്തിൽ 300 സീറ്റുകളുള്ള വിമാനം നിർമിക്കാനായിരുന്നു പദ്ധതി. ബ്രിട്ടിഷ് കമ്പനിയായ റോൾസ് റോയ്സിനായിരുന്നു എൻജിൻ നിർമാണ ചുമതല. എന്നാൽ, ഈ മേഖലയിലെ റോൾസ് റോയ്സിന്റെ അനുഭവ പരിചയക്കുറവ് പല കമ്പനികളെയും പദ്ധതിയുമായി സഹകരിക്കുന്നതിൽനിന്നു പിന്നോട്ടു വലിച്ചു. അങ്ങനെ ഈ വിമാനത്തിന്റെ നിർമാണം കടലാസിൽ ഒതുങ്ങി.