XtraPulse

പുതിയ ഡിസൈനും എൻജിനുമടക്കമുള്ള മാറ്റവുമായി എക്സ്പൾസിന്റെ പുതിയ അവതാരം-എക്സ്പൾസ് 210

- നോബിൾ എം. മാത്യു

ഹീറോയെന്ന ഇന്ത്യൻ കമ്പനി നിരത്തിലെ 'ഹീറോ'യായിട്ട് നാൽപത്തൊന്നു വർഷമായി. 1984ൽ ഹീറോയും ഹോണ്ടയും കൈകോർത്തു തുടങ്ങിയ ജൈത യാത്രയിൽ ഹോണ്ട പാതിവഴിയിൽ വേർപെട്ടിട്ടും നിരത്തിൽ 'ഹീറോ' ആകാൻ ഹീറോ മോട്ടോ കോർപ്പിനു സാധിക്കുന്നത് മോഡൽ വൈവിധ്യം ഒന്നു കൊണ്ടു തന്നെയാണ്. എക്കാലത്തും വിപണിയുടെ പൾസറിഞ്ഞ് പുതിയ മോഡലുകളെത്തിക്കുന്നതിൽ ഹീറോ കാട്ടുന്ന മിടുക്ക് പ്രശംസനീയം. ഹോണ്ടയുമായി വേർപിരിഞ്ഞിട്ട് ഹീറോ ബ്രാൻഡിൽ ഇറങ്ങുന്ന ആദ്യ ബൈക്കാണ് ഡ്യുവൽ സ്പോർട് മോഡലായ ഇംപൾസ് 2011ൽ. അഡ്വഞ്ചർ ടൂറർ മോഡലായ 150സിസി ഇംപൾസ് വിപണിയിൽ ചർച്ചയായെങ്കിലും വില്പന കണക്കിൽ ഹീറോ പ്രതീക്ഷിച്ച അത്ര ഹിറ്റായില്ല. കാലംതെറ്റിയെത്തിയ മോഡൽ എന്നു വേണം പറയാൻ. എന്നാൽ ഇംപൾസിനെ വിപണിയിൽനിന്നു പിൻവലിച്ച ഹീറോ എക്സ്ൾസ് എന്ന പേരിൽ പരിഷ്കാരത്തോടെ പുത്തൻ എൻജിനുമായി വീണ്ടും കളത്തിലിറക്കി. സംഗതി സൂപ്പർഹിറ്റ്, പോക്കറ്റിലൊതുങ്ങുന്ന വിലയ്ക്ക് ഉഗ്രൻ റൈഡ് ക്വാളിറ്റിയുമായെത്തിയ എക്സ്പൾസ് 200നെയും 200 4വിയെയും യുവാക്കൾ കൈ നീട്ടി സ്വീകരിച്ചു. ഡ്യുവൽ സ്പോർട് മോഡലിനു വിപണിയിൽ പ്രചാരം നേടിക്കൊടുക്കുന്നതിൽ എക്സ്പൾസിന്റെ പങ്കു ചെറുതല്ല. ഇക്കഴിഞ്ഞ എക്സ്പോയിൽ എക്സ്പൾസിന്റെ പുതിയ മോഡൽ ഹീറോ അവതരിപ്പിച്ചിരുന്നു. യുവാക്കളുടെ ഹരമായി മാറിയ ആ മോഡലുമായി ഒന്നു കറങ്ങാനിറങ്ങുകയാണ്. എന്താണ് പുതുമകളും മാറ്റങ്ങളുമെന്ന് ഓടിച്ചറിയാം.

ഡിസൈൻ

എക്സ്പൾസ് 200 4വി മോഡലുമായി ടെസ്റ്റ് റൈഡ് ചെയ്തത് ഇടുക്കി പരുന്തുംപാറയിലേക്കായിരുന്നു. ഓഫ് റോഡിലും ഓൺറോഡിലും എക്സ്ൾസ് കാട്ടിയ മികവ് അമ്പരപ്പിക്കുന്നതായിരുന്നു. പുതിയ വരവിൽ മികവു കൂടി എന്നുതന്നെ പറയാം. സാധാരണക്കാരന് താങ്ങാവുന്ന വിലയിൽ ഇതു പോലൊരെണ്ണം നിർമിക്കാൻ ഹീറോ കാട്ടിയ മനസ്സിനു നൽകാം ഒരു കയ്യടി'- കട്ട ഹീറോ ഫാനായ സുഹൃത്തിന്റെ കമന്റ് ഇവിടെ കടം കൊള്ളുന്നു.