BIG BEAR

650 സിസി ട്വിൻ സിലിണ്ടർ എൻജിനുമായി ഇന്റർസെപ്റ്ററിന്റെ സ്ക്രാംബ്ലർ പതിപ്പ് ബെയർ 650

- നോബിൾ എം. മാത്യു

650 സിസി വിഭാഗത്തിൽ താരനിബിഡമാണ് റോയൽ എൻഫീൽഡിന്റെ നിര. ഇന്റർസെപ്റ്റർ, കോണ്ടിനെന്റൽ ജിടി, സൂപ്പർ മീറ്റിയോർ, ഷോട്ട്ഗൺ എന്നീ ജഗകില്ലാടികളുടെ കൂട്ടത്തിലേക്കാണ് ബെയർ 650 എന്ന പുതിയൊരു താരത്തെ കമ്പനി അവതരിപ്പിച്ചത്. കൂടുതൽ കരുത്തുള്ള, ഓൺറോഡിലും അത്യാവശ്യം ഓഫ്റോഡിലും പായിക്കാൻ പാകത്തിൽ പരുവപ്പെടുത്തിയെടുത്ത സ്ക്രാംബ്ലർ മോഡലാണ് ബെയർ 650. വിശദമായ ടെസ്റ്റ് റൈഡിലേക്ക്

ബെയർ 650

കലിഫോർണിയയിലെ മരുഭൂമിയിൽ അരങ്ങേറിയിരുന്ന റേസായിരുന്നു ബിഗ് ബെയർ റൺ ചാംപ്യൻഷിപ്പ്. 1960ൽ 764 പേർ മത്സരിച്ച ഈ ചാംപ്യൻഷിപ്പിൽ കപ്പടിച്ചത് എഡ്ഡി മൾഡർ എന്ന പതിനാറുകാരനാണ്. 500 സിസി റോയൽ എൻഫീൽഡ് ഫ്യൂറിയി ലാണ് എഡ്ഡി ആ വിജയം കൈവരിച്ചത്. ആ വിജയത്തിന്റെ സ്മരണാർഥമാണ് റോയൽ എൻഫീൽഡ് പുതിയ മോഡലിന് ബെയർ 650 എന്ന പേരു നൽകിയത്.

ഡിസൈൻ

മാസ് ലുക്കും അടിപൊളി കളർ സ്കീമും ഡ്യുവൽ പർപ്പസ് ടയറുകളും സ്ക്രാംബ്ലർ ടൈപ് ടെയിൽ സെക്ഷനുമാണ് ബെയർ 650യിലേക്ക് നോട്ടം പായിക്കുന്നത്. മാത്രമല്ല ഒറ്റക്കാഴ്ചയിൽ തന്നെ ഹെവി മെറ്റൽ എന്ന ഫീലും ബെയർ നൽകുന്നുണ്ട്. സാംബ്ലറുകളുടെ ക്ലാസിക് ശൈലി കൊണ്ടുവരാൻ ശ്രമിച്ചതു വിജയിച്ചിട്ടുണ്ട്. വശത്തെ റേസ് നമ്പർ പ്ലേറ്റ് ഉദാഹരണം. ടെസ്റ്റ് റൈഡ് ചെയ്ത ബൈക്കിന്റെ വൈൽഡ് ഹണി യെല്ലോ കളർ തീം അടിപൊളി. ഇതുകൂടാതെ നാല് കളർ ഓപ്ഷനുകൾ കൂടിയുണ്ട്.