CHARMING BOY

ആധുനിക ഫീച്ചറുകളുമായി സ്റ്റൈലിഷ് ലുക്കിൽ സുസുക്കി അവനിസ്

- roshni

സുസുക്കിയുടെ ചാമിങ് മോഡലാണ് അവനിസ്. അവനി എന്നാൽ ഭൂമി.

ഭൂമിയെ റോഡായും കണക്കാക്കാമല്ലോ... അപ്പോൾ റോഡിനിണങ്ങിയത് എന്നാകും അവനിസ് കൊണ്ട് സുസുക്കി ഉദ്ദേശിക്കുന്നത്.

സ്കൂട്ടർ ശ്രേണിയിലെ ഏറ്റവും സ്പോർട്ടി സ്കൂട്ടർ എന്ന വിശേഷ ണവുമായാണ് അവനിസ് 2021ൽ വിപണിയിലെത്തിയത്. മൂന്നു വർഷത്തിനുള്ളിൽ അഴകും പെർഫോമൻസും മൈലേജും ഒത്തിണങ്ങിയ ബ്രാൻഡ് ആയി അവനിസ് ശ്രദ്ധിക്കപ്പെട്ടു. അതിനുശേഷമെത്തിയ പുതിയ തലമുറ മോഡലുകൾ, പ്രത്യേകിച്ചും ഇലക്ട്രിക് സ്കൂട്ടറുകൾ കത്തിക്കയറിയപ്പോൾ ഒപ്പം നിൽക്കാൻ മാറ്റങ്ങൾ കൂടിയേ തീരൂ എന്നു മനസ്സിലാക്കിയ സുസുക്കി അവനിസിനെ പരിഷ്കരിച്ചിറക്കിയിരിക്കുകയാണ്.

ഐസി എൻജിൻ മോഡലുകളിൽ പെർഫോമൻസ് സ്കൂട്ടർ ഇഷ്ടപ്പെടുന്നവരെയാണ് ഈ സുസുക്കി മോഡൽ ലക്ഷ്യം വയ്ക്കുന്നത്. കെട്ടിലും മട്ടിലും അടിമുടി മാറ്റങ്ങളുമായി എന്ന ക്ലീഷേ ഡയലോഗ് ഇവിടെ വെറുതെയാകില്ല. ആധുനിക ഫീച്ചറുകളും ആകർഷകമായ നിറങ്ങളുമായി വരുന്ന അവനിസിലെ മാറ്റങ്ങൾ അറിയാം.

ഡിസൈൻ

ബോഡി മൗണ്ട് ഹെഡ്ലാംപ്, ബ്രൈറ്റ് എൽഇഡി സ്പോർട്ടി മീറ്റർ വൈസർ, മോട്ടർസൈക്കിളിലേതു പോലുള്ള ആകർഷകമായ റിയർ ഇൻഡിക്കേറ്റർ എന്നിങ്ങനെ സ്പോർട്ടി ലുക്കിൽ കോംപ്രമൈസ് ഇല്ല. സൈഡ് പാനലുകളിലും ഫ്രണ്ടിലും നൽകിയിട്ടുള്ള വൈബ്രന്റ് ബോഡി ഗ്രാഫിക്സ് ആണ് മറ്റൊരു പുതുമ.

സ്പോർട്ടി മഫ്ലർ കവറും ആകർഷകമാണ്.