മിന്നും താലിപ്പൊന്നിൽ ഇവളെൻ സ്വന്തം

വിവാഹദിനം പുലർച്ചെ കാറപകടത്തിൽ ഗുരുതരമായി പരുക്കേറ്റ ആവണിക്ക് ആശുപത്രിയിൽ വച്ചു വരൻ ഷാരോൺ താലി ചാർത്തി...തുടർന്നു വായിക്കുക

- അഞ്ജലി അനിൽകുമാർ

ആ താലി ഞാനവൾക്കു നൽകിയ ഉറപ്പാണ്. ജീവിതത്തിൽ എന്തൊക്കെ പ്രതിസന്ധികൾ നേരിടേണ്ടി വന്നാലും ഞാനൊപ്പമുണ്ടെന്ന വാക്കാണത്'' തുമ്പോളി മാധവം വീട്ടിൽ ആവണിയെ ചേർത്തു പിടിച്ചിരുന്നു ഷാരോൺ ഇങ്ങനെ പറയുമ്പോൾ മനസ്സിലേക്ക് ഓടി വന്നത് ആ കാഴ്ചയാണ്.

ആശുപത്രിക്കിടക്കയിൽ, അത്യാസന്ന നിലയിൽ കിടക്കുന്ന പെൺകുട്ടിയെ താലികെട്ടുന്ന ചെറുപ്പക്കാരൻ. ആലപ്പുഴ സ്വദേശികളായ ഷാരോണിന്റെയും ആവണിയുടേയും വിവാഹം മണിക്കൂറുകൾക്കുള്ളിൽ ലക്ഷക്കണക്കിന് ആളുകളിലേക്കെത്തി. പ്രാർഥനകളും സ്നേഹവും കമന്റുകളും മെസേജുകളുമായി നിറഞ്ഞു. എങ്കിൽപ്പോലും 21.11.2025 എന്ന തിയതി ഇരുവർക്കും ഒരു പേടി സ്വപ്നമാണ്. ഒരായിരം മോഹങ്ങളും പ്രതീക്ഷകളുമായി കാത്തിരുന്ന ദിവസം നിമിഷങ്ങൾക്കുള്ളിലാണു വേദനയുടെ നിഴൽ പടർത്തുന്ന ഓർമയായി മാറിയത്.

അപകടത്തിൽ ശരീരത്തിനും മനസ്സിനുമേറ്റ ആഘാതത്തിൽ നിന്നു ഷാരോണിന്റെ കൈപിടിച്ച് ആവണി ജീവിതത്തിലേക്കു തിരികെ നടന്നു തുടങ്ങി. എങ്കിലും ആ ദിവസത്തിലേക്കു തിരിഞ്ഞു നോക്കാനൊരുങ്ങവേ ആവണിയുടെ വാക്കുകളിൽ ഭീതിയുടെ വിറയൽ പടർന്നു.

ഓർക്കുമ്പോൾ ഇപ്പോളും ഭയം

“കല്യാണത്തിന് ഒരുങ്ങാൻ ആലപ്പുഴയിൽ നിന്നു കോട്ടയം വരെ പോയത് എന്തിനാണ് എന്നു പലരും ചോദിച്ചു. എല്ലാ പെൺകുട്ടികൾക്കും വിവാഹദിവസം ഏറ്റവും നല്ല രീതിയിൽ ഒരുങ്ങണമെന്നല്ലേ മോഹം. അതിൽ എനിക്കൊരു തീരുമാനമേ ഉണ്ടായിരുന്നുള്ളൂ. കോട്ടയത്തുള്ള ബ്രൈഡൽ മേക്ക്ഓവേഴ്സ്.

വിവാഹദിവസം പുലർച്ചെ രണ്ടു മണിയോടെ ഞാനും അപ്പച്ചിയും കസിനും കാറിൽ കോട്ടയത്തേക്കു തിരിച്ചു. കാർ ഓടിച്ചതു കസിനാണ്. ഞാൻ മുന്നിലും അപ്പച്ചി പിൻ സീറ്റിലുമാണിരുന്നത്. അപകടത്തിനു തൊട്ടുമുൻപ് നോക്കുമ്പോൾ സ്റ്റുഡിയോയിൽ എത്താൻ പത്തു മിനിറ്റേയുള്ളൂ. പിന്നീടെന്താണു സംഭവിച്ചതെന്നു ഇപ്പോഴുമറിയില്ല.

ഒരു വലിയ ശബ്ദം കേട്ടു, ചുറ്റും ഇരുട്ടു മൂടി. അപ്പച്ചി വേദനകൊണ്ടു കരയുന്നതു കേൾക്കാം. അപകടത്തിന്റെ ആഘാതത്തിൽ എന്റെ കഴുത്തിൽ സീറ്റ് ബെൽറ്റ് മുറുകിയിരുന്നു. അധികം വൈകാതെ ആളുകൾ ഓടിക്കൂടി. അവർ എന്നോടു പുറത്തേക്ക് ഇറങ്ങാൻ ആവശ്യപ്പെടുന്നുണ്ടങ്കിലും കാലുകൾ അനക്കാൻ സാധിച്ചില്ല. കാൽ ഒടിഞ്ഞു എന്നാണു ഞാൻ കരുതിയത്.