ആരവല്ലി കുന്നുകളിലെ കൃഷ്ണൻ

ശ്രീകൃഷ്ണനെ ഏഴു വയസ്സുള്ള ശ്രീനാഥ്ജിയായി ആരാധിക്കുന്ന നാഥ്വാരയിലേക്കു ഒരു യാത്ര

- ഡോ. സിന്ധു വിജയകുമാർ

ഉണ്ണിക്കണ്ണന്റെ പിറന്നാളിതാ എത്തി... എങ്ങും സന്തോഷത്തിന്റെ അലകൾ. പൂജാമുറിയിലേക്കു നീളുന്ന കുഞ്ഞിക്കാലടികളുടെ കോലങ്ങളും വെണ്ണയുടെയും നെയ്യപ്പത്തിന്റെയും പാൽപ്പായസത്തിന്റെയും കൊതിയൂറുന്ന ഗന്ധവും ശ്രീകൃഷ്ണ ജയന്തിക്കു മാറ്റു കൂട്ടുന്നു. കുഞ്ഞുങ്ങളെ ബാലഗോപാലനായി അണിയിച്ചൊരുക്കിയും ഭജനകൾ പാടിയും വീടുകൾ അമ്പലങ്ങളായി മാറും. ഈ ശ്രീകൃഷ്ണ ജയന്തിക്കു കൃഷ്ണനെ ഏഴു വയസ്സുള്ള കുട്ടിയുടെ രൂപത്തിൽ ആരാധിക്കുന്ന നാഥ്വാരയിലേക്കു നമുക്കൊരു യാത്ര പോയാലോ?

നാഥ്ദ്വാര വലിയ നഗരമൊന്നുമല്ല. ഉദയ്പൂരിൽ നിന്ന് ആരവല്ലി മലനിരകളിലൂടെ വളഞ്ഞുപുളഞ്ഞ റോഡിലൂടെ യാത്ര ചെയ്യുമ്പോൾ തന്നെ അന്തരീക്ഷത്തിന് ഒരു മാറ്റം സംഭവിക്കുന്നതായി അനുഭവപ്പെടും. ക്ഷേത്രമണികളുടെ നേർത്ത ശബ്ദവും പുതിയ പേടയുടെ മണവും ഭക്തിയുടെ സുഗന്ധവും അന്തരീക്ഷത്തിൽ നിറഞ്ഞുനിൽക്കും.

ശ്രീകൃഷ്ണനെ ഇവിടെ ശ്രീനാഥ്ജിയായി ആരാധിക്കുന്നു. ശ്രീനാഥ്ജിയുടെ ദിവസേനയുള്ള എട്ടു ദർശനങ്ങളുടെ താളത്തിനനുസരിച്ചു ചലിക്കുന്ന ചെറിയ പട്ടണമാണിത്. ക്ഷേത്രത്തിലേക്കുള്ള വഴികൾ ഇടുങ്ങിയതും തിരക്കേറിയതുമാണ്. അവിടെ മഞ്ഞ പൂമാലകൾ വിൽക്കുന്ന കച്ചവടക്കാരെയും മനോഹരമായ ചിത്രങ്ങൾ നിരത്തിവച്ച കടകളെയും അടുത്ത ദർശനത്തിനായി തിടുക്കത്തിൽ ഭജനകൾ പാടി പോകുന്ന തീർഥാടകരെയും കാണാം.

ക്ഷേത്രത്തിന്റെ ഐതിഹ്യം