ഷോക്കടിക്കുമോ സോളർ

പുരപ്പുറ സൗരോർജ ഇടപാടുകൾക്കു പുതിയ വ്യവസ്ഥകൾ വരുമ്പോൾ ലാഭകരമാകുമോ സോളർ വൈദ്യുതി? ഉപയോക്താക്കൾ പറയുന്നു

- രൂപാ ദയാബ്ജി

സോളർ വീണ്ടും വാർത്തകളിൽ നിറയുകയാണ്. ഗാർഹിക ഉപയോക്താക്കളുടെ മനസ്സിൽ ആശങ്ക ഉണർത്തുന്ന ഒരു വാർത്തയാണു സോളറിനെ വീണ്ടും ചർച്ചയാക്കുന്നത്. പുരപ്പുറ സൗരോർജ ഇടപാടുകൾക്കു പുതിയ വ്യവസ്ഥകൾ ഏർപ്പെടുത്തുന്നതിനുളള സംസ്ഥാന വൈദ്യുതി റെഗുലേറ്ററി കമ്മിഷന്റെ കരടു ചട്ടത്തിലാണു സംശയങ്ങളും ചോദ്യങ്ങളും ഉയരുന്നത്.

എന്നുമെന്നും കൂടി വരുന്ന കറന്റ് ബില്ലിനു പരിഹാരമായാണു മിക്കവരും സോളറിലേക്കു ചുവടു മാറിയത്. എന്നാൽ, ഇതു വരുംകാലത്തു തിരിച്ചടിയാകുമോ എന്നു പലരും ഭയക്കുന്നു. ഗാർഹിക സോളർ ഉത്പാദനവും ഉപയോഗവും സംബന്ധിച്ച ആശങ്കകൾക്ക് അടിസ്ഥാനമില്ലെന്നു വൈദ്യുതി മന്ത്രി കെ. കൃഷ്ണൻ കുട്ടി പറയുന്നു, “സൗരോർജ ഉത്പാദകരുടെ മീറ്ററിങ് രീതിയിൽ കെഎസ്ഇബി വലിയ തോതിൽ മാറ്റം വരുത്തുന്നു എന്ന അടിസ്ഥാനരഹിതമായ പ്രചാരണം സോഷ്യൽ മീഡിയയിൽ വ്യാപകമാണ്. വാസ്തവ വിരുദ്ധമായ പ്രചാരണങ്ങളിൽ വഞ്ചിതരാകാതെ വസ്തുതകൾ തിരിച്ചറിയണം.'' എന്താണു സോളറിലെ ആശങ്കകൾ? നിലവിലെ രീതികളിൽ മാറ്റം വരുന്നത് ഉപയോക്താക്കളെ എങ്ങനെ ബാധിക്കും? സോളർ ഉപയോഗിക്കുന്നവരും ആശങ്കയില്ലാതെ ചുവടുവയ്ക്കുന്നവരും അനുഭവങ്ങൾ പറയുന്നു.

ഓൺ ഗ്രിഡ്, ഓഫ് ഗ്രിഡ്

ഗാർഹിക സോളർ വൈദ്യുതി ഉത്പാദനവും ഉപയോഗവും രണ്ടു തരത്തിലുണ്ട്. പകൽ ഉൽപാദിപ്പിക്കുന്ന സോളർ വൈദ്യുതി കെഎസ്ഇബി ഗ്രിഡിലേക്കു നൽകി, അതിനു പകരമായി ഗ്രിഡിൽ നിന്നുള്ള വൈദ്യുതി ഉപയോഗിച്ച് ഉപകരണങ്ങൾ പ്രവർത്തിപ്പിക്കുന്നതാണ് ഓൺ ഗ്രിഡ്. എന്നാൽ, വീട്ടിൽ ഉൽപാദിപ്പിക്കുന്ന സോളർ വൈദ്യുതി ബാറ്ററിയിൽ ശേഖരിച്ച്, അതുപയോഗിച്ചു തന്നെ രാത്രിയും പകലും ഉപകരണങ്ങൾ പ്രവർത്തിക്കുന്ന രീതിയാണ് ഓഫ് ഗ്രിഡ്.

രീതി ഏതായാലും ഗാർഹിക സൗരോർജ വൈദ്യുതി ഉത്പാദനവും ഉപയോഗവും ഏറ്റവും കാര്യക്ഷമവും സാമ്പത്തിക ലാഭം നൽകുന്നതുമാണെന്നു കോട്ടയം വൈക്കം ബ്രഹ്മമംഗലത്തെ എം.എൻ. രാധാകൃഷ്ണനും കുടുംബവും പറയുന്നു. “ഒരു വർഷമാകുന്നതേയുള്ളൂ വീട്ടിൽ മൂന്നു കിലോവാട്ടിന്റെ യൂണിറ്റ് സ്ഥാപിച്ചിട്ട്, കേന്ദ്രസർക്കാരിന്റെ പുരപ്പുറ സൗരോർജ പദ്ധതിയിൽ പെടുത്തി പ്ലാന്റ് സ്ഥാപിച്ചപ്പോൾ സബ്സിഡിയും കിട്ടി.