ഹൃദയമെഴുതും Tattoo

ടാറ്റൂവിൽ നിധി പോലെ ഒളിപ്പിച്ചു വയ്ക്കുന്ന രഹസ്യങ്ങളറിയാം. ഒപ്പം ടാറ്റൂ ചെയ്യുമ്പോൾ ശ്രദ്ധിക്കേണ്ട കാര്യങ്ങളും

- അമ്മു ജൊവാസ്

ഓരോ ടാറ്റൂവിനും ഒരു കഥയുണ്ടാകും പറയാൻ. ഹൃദയത്തോടു ചേർത്തെഴുതിയ ആയുസ്സിലെ അപൂർവ സുന്ദര നിമിഷം മനക്കരുത്തിൽ കയ്യിലൊതുക്കിയ സ്വപ്നങ്ങൾ... അങ്ങനെ എന്തും ടാറ്റൂവിലെഴുതാം.

പ്രണയം, സന്തോഷം, സങ്കടം, വേർപാട്, തോൽവികളെ അതിജീവിച്ചു പറന്നുയർന്ന ജീവിതം... ഓരോരുത്തരുടെയും ടാറ്റൂവിന്റെ കഥ വ്യത്യസ്തമാണ്. ആകാശത്തിലും ഭൂമിയിലുമുള്ള എന്തും ടാറ്റു ആക്കാം. എന്തിനേറെ, ഉണ്ടോ ഇല്ലയോ എന്നറിയാത്ത സാങ്കല്പിക ലോകം പോലും ടാറ്റൂ ആശയമായി മാറുന്നുണ്ട്. മനസ്സിന്റെ മെയ്യെഴുത്തായി മാറുന്ന ടാറ്റൂവിലെ പുത്തൻ ആശയങ്ങൾ മനസ്സിലാക്കാം.

എന്നും കണ്ണിൽ നിൻ മുഖം

ഒറിജനലിനെ വെല്ലുന്ന പ്രോട്രെയ്റ്റ് ടാറ്റൂസ്. കണ്ണിലെ തിളക്കം പോലും തുടിച്ചു നിൽക്കുന്ന പെർഫക്ഷൻ ജീവിതത്തിൽ ഒപ്പമുള്ളവരുടെയും ഇടയിൽ വച്ചു നഷ്ടപ്പെട്ടവരുടെയും മുഖങ്ങൾ എന്നെന്നും കാണാൻ അവരോടുള്ള സ്നേഹമായി പോട്രെയ്റ്റ് ടാറ്റൂസ് മാറി.

ഇത്തരം ടാറ്റൂവിൽ മുഖത്തിന്റെ ഫീച്ചേഴ്സ് അങ്ങോട്ടോ ഇങ്ങോട്ടോ ഒന്നു മാറിയാൽ ആളു തന്നെ മാറും. അതുകൊണ്ടു കിടിലോൽക്കിടിലം ടാറ്റൂ ആർട്ടിസ്റ്റിനെ തന്നെ വട്ടമിട്ടു പിടിക്കണം. മൂന്നു നാലു മണിക്കൂറിനുള്ളിൽ അവർ ടാറ്റുവിനു ജീവൻ വച്ചു നൽകും.

ടാറ്റു ചെയ്യേണ്ട ഫോട്ടോ സ്റ്റെൻസിൽ പ്രിന്റ് എടുത്തു ടാറ്റൂ ചെയേണ്ട ശരീരഭാഗത്തു പതിപ്പിക്കും. മുഖത്തിന്റെ രൂപരേഖ പതിഞ്ഞു കഴിയുന്നതും തുടങ്ങുകയാണ് ടാറ്റൂയിങ്.

മുഖത്തെ ഫീച്ചേഴ്സ് എടുത്തു കാണിക്കും വിധമുള്ള ഷേഡിങ് നൽകുന്നത് കയ്യുടെ മർദം കൂട്ടിയും കുറച്ചുമുള്ള ടാറ്റു ആർട്ടിസ്റ്റിന്റെ കരവിരുതാണ്. കണ്ണിലെ തിളക്കം നൽകുന്നത് വെള്ള ഇങ്ക് ഉപയോഗിച്ചാണ്.

ഏതു നിറത്തിലുള്ള ഇങ്ക് ഉപയോഗിച്ചു ടാറ്റൂ ചെയ്യാം. പോട്രേയ്റ്റ് സുന്ദരമാക്കാൻ നിറങ്ങളും കൂടെ ചേരാറുണ്ട്.

ഒറ്റവരയിലൊരു കഥ

നേർത്ത വരകൾ... മിനിമലിസ്റ്റിക് ഡിസൈൻ... എലഗന്റ് ടാഗ് ലൈനിൽ എത്തുന്നവയാണ് ഫൈൻ ലൈൻ ടാറ്റൂ. ഇതിൽ തന്നെ സിംഗിൾ ലൈൻ ടാറ്റൂസുണ്ട്. തുടക്കം മുതൽ അവസാനം വരെ കയ്യെടുക്കാതെ ഒറ്റ വര കൊണ്ട് ചിത്രം വരച്ചെടുത്താൽ പൊളിയല്ലേ.

ഫോട്ടോ പതിപ്പിച്ചതു പോലെ വേണ്ട എന്ന അഭിപ്രായമുള്ളവർക്ക് ഫൈൻലൈൻ ടാറ്റൂ തിരഞ്ഞെടുക്കാം. മുഖത്തിന്റെ ആകൃതി ഔഡ്ലൈൻ ആയി ചെയ്യാം.

വീതി കുറഞ്ഞും കൂടിയുമുള്ള ലൈൻ ടാക്സ് മാത്രമേ ഫൈൻ ലൈൻ ടാറ്റൂവിൽ ഉണ്ടാകൂ. ഷേഡിങ് ഇല്ല.