കണ്ണീരുപ്പും ചിരിമധുരവും

അഭിനേത്രി, നർത്തകി, കർഷക. 78-ാം വയസ്സിൽ സിനിമ നിർമാതാവിന്റെ പുതിയ റോളിലുമെത്തുന്ന കൊടുങ്ങല്ലൂരുകാരി ഐഷാബി

- ഡെൽന സത്യരത്ന

കൊടുങ്ങല്ലൂരിലെ മേത്തല ഗവ.യുപി സ്കൂളിൽ ഹെഡ് മിസ്ട്രസ് ജാസ്മിൻ കാവ്യ 2023 ഏപ്രിൽ 30നു വിരമിക്കാനുള്ള തയാറെടുപ്പിലായിരുന്നു.

യാത്രയയപ്പു സമ്മേളനവും സ്കൂളിന്റെ വാർഷികാഘോഷവും ഉദ്ഘാടനം ചെയ്തത് ഉന്നതവിദ്യാഭ്യാസ - സാമൂഹ്യനീതി വകുപ്പു മന്ത്രി ഡോ. ആർ. ബിന്ദു. അവരുടെ പ്രസംഗത്തിലൂടെ ഓർമയിലെ അഞ്ചാംക്ലാസ് സദസ്സിന്റെ മനസ്സിലേക്കെത്തി.

അഞ്ചാം ക്ലാസ് മുതൽ എട്ടാം ക്ലാസ് വരെ സഹപാഠിയും ആത്മമിത്രവും ആയിരുന്ന ജാസ്മിൻ കാവ്യയെയും ജാസ്മിന്റെ മമ്മി ഐഷാബിയെയും ഡോ. ബിന്ദുവിനു മറക്കാനാകുമായിരുന്നില്ല.

അഞ്ചു മുതൽ ഏഴു വരെ ക്ലാസ്സുകളിൽ മുക്കാൽ പാവാടയിട്ടു ജട പിടിച്ച മുടിക്കെട്ടുമായി പരീക്ഷാപേപ്പർ വാങ്ങുന്ന ജാസ്മിന് മാർക്കും തീരെ കുറവായിരുന്നു. ജാസ്മിൻ മൂന്നാം ക്ലാസ്സിൽ പഠിക്കുമ്പോൾ അമ്മയായ ഐഷാബി കുടുംബകാരണങ്ങളാൽ മക്കളിൽ നിന്നു വേർപിരിഞ്ഞു. ഉപ്പയുടെ വീട്ടിൽ നിന്നാണു കുഞ്ഞു ജാസ്മിൻ സ്കൂളിൽ വന്നു പോയിരുന്നത്.

ഇടയ്ക്ക് ഇഷ്ടഭക്ഷണങ്ങൾ തയാറാക്കി മകളുടെ സ്കൂളിലേക്ക് ഐഷാബിയെത്തും. മകളെക്കണ്ട് അവർ നിർത്താതെ കരഞ്ഞു കൊണ്ടു ഭക്ഷണം വാരിക്കൊടുക്കും. രണ്ടാളും ഒപ്പം കരഞ്ഞ് ആവോളം സ്നേഹം ഹൃദയത്തിൽ നിറയ്ക്കും.

ഏഴാം ക്ലാസോടെ കുഞ്ഞു ജാസ്മിൻ "എന്തു വന്നാലും വേണ്ടില്ല, ഞാൻ മമ്മിയുടെ അടുത്ത നിൽക്കൂ' എന്നു തീരുമാനമെടുത്തു. പിന്നാലെ സഹോദരന്മാരും.

പിന്നീടു ക്ലാസ്സിൽ ഏറ്റവും ഭംഗിയായി വസ്ത്രമണിഞ്ഞെത്തുന്ന കുട്ടിയായി ജാസ്മിൻ. ഐഷാബി മക്കൾക്ക് എല്ലാ വിഷയങ്ങൾക്കും പ്രത്യേക ട്യൂഷൻ ഏർപ്പാടാക്കി. പഠനത്തിലും മത്സരങ്ങളിലും അവർ മുന്നേറി. ഐഷാബിയെന്ന അമ്മയെ "സൂപ്പർ വുമൺ' എന്നാണു ഡോ. ബിന്ദു വേദിയിൽ വിശേഷിപ്പിച്ചത്.

കുട്ടികളാണു ജീവൻ

കണ്ണീരിന്റെ മഹാസമുദ്രം കടന്ന കഥാനായിക ഐഷാബിക്ക് ഇപ്പോൾ 78ന്റെ ചെറുപ്പം. “രണ്ടാം പ്രണയമഹായുദ്ധം' എന്ന സിനിമയുടെ നിർമാതാവ്, തമാശ നിറഞ്ഞ റീലുകളിലൂടെ സോഷ്യൽ മീഡിയയിലെ താരം അങ്ങനെ പല റോളുകളിൽ തിളങ്ങുന്ന ഐഷാബിയുടെ ജീവിതത്തിന്റെ തിരക്കഥ കേൾക്കാം.