സ്നേഹമരുന്ന്

ആറുവയസ്സു വരെ കുട്ടികൾ കാണിക്കുന്ന വാശിയിൽ മാതാപിതാക്കൾ അസ്വസ്ഥരാകേണ്ട കാര്യമില്ല. സ്നേഹമരുന്നു കൊടുത്ത് അതു മാറ്റാവുന്നതേയുള്ളൂ

- ഡോ. എംകെസി നായർ D.Sc സ്പെക്ട്രം ചൈൽഡ് ചീഫ്, നിംസ് ഡെവലപ്മെന്റ് സെന്റർ, നെയ്യാറ്റിൻകര ആരോഗ്യ സർവകലാശാല മുൻ വൈസ് ചാൻസിലർ

രണ്ടുവയസ്സിനോട് അടുപ്പിച്ചാണു കുട്ടികൾ വാശി കാണിച്ചു തുടങ്ങുന്നത്. എന്താണ് കാരണം എന്നറിയാൻ പോലും അറിയാൻ കഴിയാത്ത കരച്ചിൽ. പിന്നെ ഏങ്ങലടിച്ചു കൈയൊക്കെ ചുരുട്ടി പ്രതിഷേധം. ഇഷ്ടപ്പെട്ടതു കിട്ടിയില്ലെങ്കിൽ പിന്നെയും വാശി. "എന്തൊരു വാശിയാണ് കുഞ്ഞിന് ' എന്ന് എല്ലാവരും പറയുകയും ചെയ്യും.

അസുഖങ്ങളോ മറ്റു കുഴപ്പങ്ങളോ ഇല്ലെങ്കിൽ ഈ വാശി തെറ്റല്ല. കുഞ്ഞിന്റെ മാനസിക, ശാരീരിക വളർച്ച ശരിയായ രീതിയിലാണ് എന്നതിന്റെ തെളിവാണത്. കുട്ടി സ്വതന്തനാണെന്ന് കാണിക്കുന്നതാണിത്. കളിപ്പാട്ടം കെ നീട്ടി എടുക്കാൻ നോക്കുന്നു, കിട്ടാത്തപ്പോൾ വാശി കാണിക്കുന്നു, അതു ദേഷ്യമായി മാറുന്നു. നടക്കാൻ ശ്രമിക്കുന്നു. കൈ പിടിക്കുമ്പോൾ തട്ടിമാറ്റാൻ നോക്കുന്നു. ശബ്ദമുണ്ടാക്കുന്നു. ഇതൊക്കെയാണ് ആ സ്വാതന്ത്ര്യ പ്രഖ്യാപനത്തിന്റെ ലക്ഷണങ്ങൾ.

ഇതെല്ലാം കുട്ടികളുടെ മാനസിക ശാരീരിക വളർച്ചയുടെ തെളിവുകളാണ്. എന്നാൽ വാശിക്കപ്പുറമുള്ള ദേഷ്യവും അതിന്റെ വലിയ അളവിലുള്ള പ്രകടനങ്ങളും ശ്രദ്ധിക്കുക തന്നെ വേണം. ആറുവയസ്സിനുള്ളിൽ അമിതദേഷ്യത്തോടെയുള്ള പെരുമാറ്റങ്ങൾ കൂടുകയാണെങ്കിൽ അതു നിരീക്ഷിക്കണം. വാശി കൂടി കുട്ടി സ്വയം മുറിവേൽപ്പിക്കാൻ ശ്രമിക്കുന്നു, കളിപ്പാട്ടങ്ങൾ എറിഞ്ഞുടയ്ക്കുന്നു, ക്ലാസ് മുറിയിൽ മറ്റു കുട്ടികളെ ഉപദ്രവിക്കുന്നു. ഇതൊക്കെ കൂടുതലായി കാണുന്നെങ്കിൽ കുട്ടിയെ നിരീക്ഷിക്കണം.

വാശി മാറ്റാൻ 5 വഴികൾ

രണ്ടു മുതൽ നാലു വയസ്സു വരെയാണ് സാധാരണയായി കുട്ടികൾ വാശി കാണിക്കാറുള്ളത്. 5 കാര്യങ്ങൾ ശ്രദ്ധിച്ചാൽ വാശിയുടെ അളവ് കുറയ്ക്കാം.

1. അവഗണിക്കുക

ഒക്കത്തിരിക്കുന്ന കുഞ്ഞ് അമ്മയെ നുള്ളുന്നു അടിക്കുന്നു. ഇത്തരം സാഹചര്യത്തിൽ കുഞ്ഞിനെ തിരിച്ച് അടിക്കുക,ആളുകൾക്കു മുന്നിൽ വച്ചു വഴക്കു പറയുക, തുടങ്ങിയ പ്രതികരണങ്ങൾ ഫലപ്രദമാവില്ല.