മരണമെത്തും മുൻപേ

ജീവിതാവസാന ദിവസങ്ങൾ ആശുപത്രിയിൽ ആകണോ? വീട്ടിലായിരിക്കണമോ? ചികിൽസ എങ്ങനെയാകണം? 18 തികഞ്ഞ ആർക്കും അതു നിയമപ്രാബല്യമുള്ള രേഖയാക്കാനുള്ള അവസരമാണു ലിവിങ് വിൽ

- ഡോ.ബി.പത്മകുമാർ പ്രിൻസിപ്പൽ ഗവ. മെഡിക്കൽ കോളജ്, കൊല്ലം

ജീവിതത്തെക്കുറിച്ചു മികച്ച പ്ലാനിങ് ഉള്ളവരാണു നമ്മളിൽ പലരും. കഥ പോലെ തന്നെ ഒരവസാനമുണ്ട് ജീവിതത്തിനും. ആ അവസാന രംഗം എന്താകുമെന്നു നമുക്കു നേരത്തെ മനസ്സിലാക്കാൻ കഴിയില്ല. പക്ഷേ, അതെങ്ങനെ ആകരുതെന്നു തീരുമാനിക്കാനുള്ള അവസരമുണ്ട്. ബുദ്ധിയും ഓർമയും തെളിഞ്ഞു നിൽക്കുമ്പോൾ തന്നെ അതു നിയമപ്രാബല്യമുള്ള രേഖയാക്കാം. അതിനുള്ള അവസരമാണു ലിവിങ് വിൽ.

ചിലർക്ക് അവസാനനിമിഷങ്ങൾ സ്വന്തം വീട്ടിലാകണമെന്നാകും ആഗ്രഹം. മരണാനന്തരം ശരീരം മെഡിക്കൽ കോളജിലെ വിദ്യാർഥികൾക്കു പഠനത്തിനായി വിട്ടുകൊടുക്കണമെന്ന് ആഗ്രഹിക്കുന്നവരുണ്ട്. മരണശേഷം (ബയിൻ ഡെത്ത് അവയദാനം ചെയ്യണമെന്ന താല്പര്യം വരെ ലിവിങ് വില്ലിൽ ഉൾപ്പെടുത്താം. ഇത്തരം കാര്യങ്ങൾ ലിവിങ് വില്ലിൽ രേഖപ്പെടുത്തി വയ്ക്കുന്നതു കൂടാതെ ഏറ്റവും അടുത്ത കുടുംബാംഗങ്ങളെ അറിയിക്കുകയും വേണം.

ഇന്റൻസീവ് കെയർ യൂണിറ്റിൽ യന്ത്രങ്ങളുടെ സഹായത്തോടെ ഒരു ജീവച്ഛവമായി മരണം വലിച്ചു നീട്ടാൻ താൽപര്യമില്ലാത്തവരുണ്ട്. നമ്മുടെ വസ്തുവകകൾ സംബന്ധിച്ച് വിൽപത്രം എഴുതി വയ്ക്കുന്നതുപോലെ ജീവിതാന്ത്യ ചികിൽസ സംബന്ധിച്ചുള്ള താൽപര്യങ്ങൾ നിയമപരമായ രേഖയാക്കാം.

അതുവഴി വ്യക്തിയുടെ താൽപര്യങ്ങൾക്കും ആശയാഭിലാഷങ്ങൾക്കും വിരുദ്ധമായ ചികിത്സ ഒഴിവാക്കാം. ജീവിക്കാൻ മാത്രമല്ല, അന്തസ്സോടെ യാത്രപറയാനും ഉള്ള അവകാശമാണു ലിവിങ് വിൽ തരുന്നത്. എന്നാൽ ഇതു ചികിൽസ നിഷേധിക്കാനുള്ള അവസരമാണെന്നു തെറ്റിധരിക്കരുത്. വ്യക്തി അബോധാവസ്ഥയിൽ ആകുകയോ രോഗം മൂലം ഭേദപ്പെടുത്താനാകാത്ത വിധം അതീവ ഗുരുതരാവസ്ഥയിൽ ആകുകയോ ചെയ്യുമ്പോഴാണു ലിവിങ് വില്ലിന്റെ പ്രസക്തി. വിദഗ്ധഡോക്ടർമാർ അടങ്ങുന്ന മെഡിക്കൽ ബോർഡ് സ്ഥിതി പരിശോധിച്ച് അംഗീകാരം നൽകിയാൽ ലിവിങ് വിൽ അനുസരിച്ചു കാര്യങ്ങൾ നീങ്ങും.

മെഡിക്കൽ ബോർഡുകളുടെ പ്രാധാന്യം