കടക്കെണി കരുതലോടെ നീങ്ങാം

കടക്കെണിയിൽ വീഴാതിരിക്കാനും വീണുപോയാൽ പടിപടിയായി രക്ഷപെടാനും വഴികളുണ്ട്

- രാഖി റാസ്

ഇടയ്ക്കൊക്കെ മാധ്യമങ്ങളിൽ കാണാം, കുടുംബം ഒന്നടങ്കം ആത്മഹത്യ ചെയ്ത വാർത്തകൾ. സാമ്പത്തിക പ്രശ്നമാണു കാരണമെന്നു പൊലീസ് പറഞ്ഞതായി ഒരു വരിയും ഉണ്ടാകും. തരക്കേടില്ലാത്ത ജോലിയും മികച്ച സ്കൂളുകളിൽ മിടുക്കരായി പഠിക്കുന്ന മക്കളും നല്ല നിലയിലുള്ള ബന്ധുക്കളും ഒക്കെയുണ്ടായിട്ടും ഇവരെന്താകും മരണത്തെ പുൽകാൻ തീരുമാനിച്ചത്.? കടക്കെണിയാണു പലരെയും അലട്ടുന്ന പ്രശ്നം. കടം തിരികെ ചോദിക്കുന്നവരുടെ ഭാഷ മാറുകയും വായ്പയെടുത്ത ബാങ്കുകളിൽ നിന്നു ജപ്തി നോട്ടീസ് വരികയും സമൂഹത്തിൽ തന്റെ വിലയിടിഞ്ഞു പോകുന്നു എന്ന തോന്നലുണ്ടാകുകയും മക്കളും ചിലപ്പോൾ അപമാനങ്ങൾക്ക് ഇരയാവുകയും ഒക്കെ ചെയ്യുന്ന ഘട്ടത്തിലാണു പലരും ഇത്തരമൊരു കഠിന തീരുമാനമെടുക്കുക.

വരുമാനം ഉണ്ടെങ്കിലും അതിനനുസരിച്ചു ജീവിതം ക്രമീകരിച്ചില്ലെങ്കിൽ ആരും കട ക്കെണിയിൽ ചെന്നു പെടും. ശരിയായ സാമ്പത്തിക നിയന്ത്രണം ഇല്ലാതെ വരുന്നതാ പ്രധാന കാരണം. കടക്കെണി പേടിച്ചു വായ്പയെടുക്കുകയോ അത്യാവശ്യത്തിനു പോലും പത്തു രൂപ കടം വാങ്ങാതിരിക്കുകയും ചെയ്യുന്നവരുമുണ്ട്. ആവശ്യങ്ങൾ സാധ്യമാക്കിയെടുക്കാൻ വായ്പയെടുക്കുകയും ഇഎംഐ(ഇറ്റഡ് മന്ത്രി ഇൻസ്റ്റോൾ മെന്റ് വഴി അവശ്യസാധനങ്ങൾ വാങ്ങുകയും ക്രഡിറ്റ് കാർഡിലൂടെ വില കൂടിയവ സ്വതമാക്കുകയും ഒക്കെ ഇന്നത്തെ ചുറ്റുപാടുകളിൽ വേണ്ടി വന്നേക്കാം. അവ വരുമാനത്തോടു സന്തുലിതമാകുന്ന വിധം നിയന്ത്രിതമാക്കുക എന്നതാണ് പ്രധാനം. കടം വരാതിരിക്കാനും വന്നാൽ അവ കുറച്ചു കൊണ്ടു വന്നു ജീവിതം സുരക്ഷിതമാക്കാനും വേണ്ട ചില തയാറെടുപ്പുകളെക്കുറിച്ചറിയാം.

കുടുംബത്തിന് വേണം ബജറ്റിങ്

വരവ് വലുതോ ചെറുതോ ആകട്ടെ, കുടുംബത്തിന് തീർച്ചയായും ഒരു ബജറ്റ് ഉണ്ടാകണം. ഒന്നോ അധിലധികമോ വ്യക്തികളുടെ ശമ്പളം, ബിസിനസ് ചെയ്യുന്നുണ്ടെങ്കിൽ അതിൽ നിന്നുള്ള വരുമാനം, വീടുകൾ, കടമുറികൾ പോലുള്ളവ വാടകയ്ക്ക് നൽകുന്നതിലൂടെയുള്ള വരുമാനം, കാർഷികാദായങ്ങൾ ഇവയെല്ലാം ചേരുന്നതാണ് ഒരു കുടുംബത്തിന്റെ വരുമാനം.

വരുമാനം എങ്ങനെ ചെലവാക്കണം എന്നതിനൊരു ഫോർമുലയുണ്ട്. 40 - 30 - 20 - 10 എന്നിതിനെ ചുരുക്കിപ്പറയാം. അതായതു വരുമാനത്തിന്റെ 40 ശതമാനം വീട്ടുചെലവിന്. 30 ശതമാനം വായ്പ തിരിച്ചടവുകൾക്ക് 20 ശതമാനം സമ്പാദ്യത്തിന്. 10 ശതമാനം സ്വന്തം ഇഷ്ടങ്ങൾക്ക്.