K for Korea

ഗന്നം സ്റ്റൈലിൽ തുടങ്ങി ബിടിഎസിലൂടെ ഉന്മാദലഹരിയിലാണ്ട നമ്മുടെ കൗമാരം കൊറിയയെ മാത്രം സ്വപ്നം കാണുന്നു

- രൂപാ ദയാബ്ജി

കൊറിയൻ ആൽബങ്ങളോടുള്ള ഭ്രമം കാരണം പരീക്ഷയിൽ മാർക്കു കുറഞ്ഞ കൗമാരക്കാരി ആത്മഹത്യ ചെയ്തു. കൊറിയയിലെ കാര്യമെന്തിനാ ഇവിടെ പറയുന്നതെന്ന് ചോദിക്കരുത്. കൊറിയൻ ആൽബങ്ങൾ തലയ്ക്കു പിടിച്ചിരിക്കുന്നത് അവിടുള്ളവർക്കല്ല, കേരളത്തിലെ കൗമാരക്കാർക്കാണ്.

തലയ്ക്കു പിടിക്കാൻ മാത്രം എന്താണ് ഈ കൊറിയയുടെ പ്രത്യേകത എന്നെങ്ങാനും പിള്ളേരോട് ചോദിച്ചാലോ. കണ്ണുമിഴിച്ച്, കൈചൂണ്ടി അവർ ഉറക്കെ ചോദിക്കും. “അവരെ പോലെ സുന്ദരികളും സുന്ദരന്മാരും വേറെ എവിടെയുണ്ട്. ലുക്സ് മാത്രമല്ല, അവരുടെ പാട്ടിലെ വരികളും ജീവിതത്തെ കുറിച്ച് പ്രതീക്ഷ തരുന്നതാണ്. ആ പെൺകുട്ടി മരിച്ചതിനു പിന്നിൽ വേറെന്തെങ്കിലും കാരണം കാണും. അല്ലാതെ ഞങ്ങളുടെ കൊറിയയെ കുറ്റം പറഞ്ഞാലുണ്ടല്ലോ... ല്ലോ...

ഇന്ത്യയിൽ നിന്നു പറന്നുയർന്നാൽ "അരപകൽ' ദൂരമേയുള്ളൂ ഈ രാജ്യത്തേക്ക്. സത്യത്തിൽ കൊറിയയും കേരളവും ആരംഭിക്കുന്നത് 'ക' എന്ന അക്ഷരത്തിലാണെന്ന ഒറ്റ സാമ്യമേ ഉള്ളൂ രണ്ടും തമ്മിൽ. പക്ഷേ, സൈയുടെ ഗന്നം സ്റ്റൈൽ പാട്ടുകളിലൂടെ വളർന്ന് ബിടിഎസ് ആൽബങ്ങളിലൂടെ ഉന്മാദ ലഹരിയിലാണ്ട നമ്മുടെ പുതുതലമുറ സ്വപ്നം കാണുന്നത് കൊറിയയിൽ താമസിക്കാൻ ഒരു കൊച്ചുവീടാ'ണ്. ആ നാടിനെ പറ്റി കേട്ടോളൂ.

കെ- ടെക്നിക് പിടികിട്ടി...

പോപ് സംഗീതം, സീരിയൽ, സൗന്ദര്യസംരക്ഷണം എന്നു തുടങ്ങി കൊറിയക്കാരുടെ കയ്യിലില്ലാത്ത നമ്പറുകളില്ല. പോപ്പിന്റെ മുന്നിൽ കെ ചേർത്താൽ കൊറിയൻ തരംഗമായ കെ പോപ്പായി. കെ- ഡ്രാമ, കെ ബ്യൂട്ടി എന്നിങ്ങനെ പോകുന്നു ഗൂഗിളിൽ തിരയേണ്ട ആ പേരുകൾ. “ഇപ്പോ ടെക്നിക് പിടികിട്ടി' എന്ന മോഹൻ ലാൽ ഡയലോഗ് മനസ്സിലോർത്ത് കെ റെയിൽ എന്നുമാത്രം സെർച് ചെയ്തേക്കരുതെന്ന് ഒരു എളിയ  മുന്നറിയിപ്പ്.