પ્રતિબંધિત પ્લાસ્ટિક સામે સઘન ચેકિંગ ઝુંબેશ: ૧૬ યુનિટ સીલ કરાયા

શહેરના તમામ સાત ઝોનમાં સોલિડ વેસ્ટ મેનેજમેન્ટ વિભાગે સપાટો બોલાવ્યો

- 

મ્યુનિસિપલ કોર્પોરેશનના સત્તાધીશોએ ફરી એક વખત શહેરના તમામ સાતેય ઝોનમાં પ્રતિબંધિત પ્લાસ્ટિક સામે સઘન ચેકિંગ ઝુંબેશ શરૂ કરી છે. અમદાવાદ શહેરમાં ૧૨૦ માઇક્રોનથી ઓછી જાડાઈ ધરાવતી પ્લાસ્ટિક થેલીઓ અને સિંગલ યુઝ પ્લાસ્ટિક આઇટમ પર પ્રતિબંધ મૂકવામાં આવ્યો છે. શહેરમાં પ્લાસ્ટિક પ્રદૂષણ અટકાવવા અને પર્યાવરણને સુરક્ષિત રાખવા માટે મ્યુનિસિપલ સોલિડ વેસ્ટ મેનેજમેન્ટ વિભાગ દ્વારા સાત ઝોનના ૪૮ વોર્ડમાં સ્પેશિયલ ચેકિંગ ડ્રાઇવ હાથ ધરાઈ હતી, જેમાં ૧૬ યુનિટને સીલ કરવામાં આવ્યા છે.

સોલિડ વેસ્ટ મેનેજમેન્ટ વિભાગની સ્વચ્છતા સ્ક્વોડ દ્વારા શહેરનાં વિવિધ બજાર, હોટલ, રેસ્ટોરાં, દુકાનો અને ફૂડ એકમો સહિત વિવિધ સ્થળોએ તપાસ હાથ ધરવામાં આવી હતી. તપાસ દરમિયાન પ્રતિબંધિત પ્લાસ્ટિકનો ઉપયોગ કરનારા લોકો અને વેપારીઓ સામે તાત્કાલિક કાર્યવાહી કરવામાં આવી હતી.