Byeboere voel IMPAK van droogte en brande

Byeboere in die Suid-Kaap en Klein-Karoo, wat toenemend weens die voortslepende droogte sukkel om hul swerms aan die lewe te hou, sê die onlangse brande in die streek is 'n dubbele slag vir hulle bedryf.

- Alida de Beer

Blokoms speel 'n belangrike rol in die byebedryf in die Suid-Kaap.

Weens die droogte het die blommetjies in fynbosveld nie meer nektar nie, en boonop is groot dele veld in die brande vernietig, wat eers oor twee of drie jaar sal herstel.John Stoltz, 'n bestuurslid van die Suid-Kaap Byebedryfvereniging, sê as daar nie behoorlike reën voor die winter val nie, staar die bedryf 'n krisissituasie in die gesig. "Ons het nie nou 'n krisis nie, hoewel die boere toenemend hul bye moet voer, en dit is duur."

Stoltz het korwe in die onlangse brande by Aalwyndal, Mosselbaai, verloor. As byeverwyderingspesialis in die dorp was dit een van die persele waarheen hy die swerms gewoonlik vir rehabilitasie geskuif het, 'n proses met hoë insetkoste en wat toewyding verg.

"'n Mens moet mooi begroot. Ek moet 'n nuwe plek vind wat nie te ver van die dorp af is nie, nuwe byekaste koop, bye vang, en hulle dan versterk sodat meer swerms vorm."