Bek-en-klouseer-uitbrekings: ‘Boere moet biosekuriteit omarm’

Biosekuriteitsmaatreëls is 'n prioriteit wat boere in die Wes-Kaap moet omarm, veral in die lig van voortslepende bek-en-klouseer-uitbrekings (BEK) in ander gebiede in die land.

- Alida de Beer

Volgens Ellouise Hattingh, 'n biosekuriteitsbeampte van BKB wat oor 'n wye streek werksaam is, kan 'n boer se besigheid oornag ineenstort wanneer BEK uitbreek. As adviseur het sy die verwoesting van die siekte in die Oos-Kaap, waar wydverspreide uitbrekings sedert verlede jaar voorgekom het, eerstehands waargeneem.

Suiwelboere ervaar BEK se impak die ergste omdat melkbeeste die ernstigste simptome toon. Maar selfs by ander vee waar slegs matige simptome waargeneem word, is die gevolge verreikend weens die onmiddellike inperking van uitvoere en verkope van produkte of diere.