Groot afwagting vir rugbyeindstryde

As daar nou een sportgebeurtenis is wat die rugbykoors in die Suid-Kaap en Hessequa die hoogte laat inskiet, is dit die jaarlikse eindstryd van die SWD-rugbyunie se Superliga. En dis nou weer sulke tyd.

- Hugo Redelinghuys

Die eindstryd van die Superliga se Top 8-kompetisie vind Saterdag 11 Oktober op Outeniquapark plaas wanneer Evergreens en Heidelberg mekaar aandurf.

Die afskop is om 16:00 en verwag maar 'n toetsatmosfeer. Die eerste wedstryde is geskeduleer vir 09:00. Outeniquapark gaan uit sy nate bars en laatslapers kan hulle regmaak vir 'n stywe stappie na die stadion, want daar gaan geen beskikbare parkering wees nie.

In die eindstryd om die Uitdaagbeker, wat die Superliga s'n voorafgaan, kom Silver Stars teen Harlequins te staan.