Jy bly steeds my Springbok

Saterdagoggend bly in die rugbyseisoen 'n hoogtepunt in talle huishoudings waar boetie begaafd, gou reg is om sy skool se rugbyspan te haal!

- André Venter

Pa, ma, oupa, ouma en sussie gaan slaap saam met Boetie vroeg Vrydagaande, almal moet uitgerus wees vir die groot stryd wat môreoggend gelewer moet word.

Boetie kry vir oulaas Vrydagaand sy piesangenergiedrankie, oupa en pa se enetjie met Coke dien ook vir dieselfde rede, terwyl ouma en ma en sussie skoon lemoensap aan boord neem. Môre speel Boetie en hy sal ondersteuning nodig hê!

Die dag se eerste lig is skaars daar of oupa vroetel met 'n koffiekan - hy het sleg geslaap, heelnag gedroom Boetie sny deur die verdediging en lê rieme neer vir 'n pragdrie in die hoek. Ander oupas kyk so met skaapoë na hom en knik met die koppe. Hy glimlag so half windgat terug. Dis my kleinseun daardie, sê sy lyftaal!

Die keteltjie blaas en raas en bring hom wreed terug uit sy oomblik van glorie, "maar dit sal darem wraggies lekker wees", dink hy met 'n glimlag en skink sy boeretroos.