Arende toon weer gróót karakter

Die SWD Arende het nou wel die afgelope Saterdag in Kempton Park teen die Valke met 26 - 54 vasgeval, maar hul selfvertroue sou beslis 'n hupstoot gekry het met die wete dat hulle tog die slaankrag het om die Valke te klop.

- Hugo Redelinghuys

"Die Valke kán oorwin word, maar ons moet dit net in ons koppe kry," sê Johan Lerm, hoofafrigter.

Die rustydtelling was 14 - 7 in die Valke se guns, maar met die omdraaislag het die Arende twee drieë gaan druk om in die 59ste minuut met 19 - 14 voor te loop.

"Hulle is glad nie so onoorwinlik nie en selfs hul afrigter het ná die wedstryd aan my erken dat hy in een stadium nogal bekommerd was dat dinge gaan uitrafel."

Die Arende se ondergang het in die laaste 12 minute gekom toe die Valke losgetrek en vier drieë aangeteken het. "Dit was 'n oomblik van waansin en het die wind uit ons seile gehaal."