இந்திய ஆடவர் அபாரம்; மகளிர் ஏமாற்றம்

ஆக்ரா முஸ்லிம் கலைஞர்கள் பிரதமர் மோடிக்கு சிறப்பு பரிசு

- 

கோலாலம்பூர், மே 21: மலேசியா மாஸ்டர்ஸ் பாட்மின்டன் போட்டியின் முதல்சுற்றில், ஹெச். எஸ். பிரணாய் உள்ளிட்ட இந்திய வீரர்கள் அசத்தலான வெற்றியைப் பதிவு செய்தனர். எனினும், பி.வி. சிந்து உள்ளிட்ட வீராங்கனைகள் ஏமாற்றம் அளித்து போட்டியிலிருந்து வெளியேறினர்.

போட்டியின் முதல் சுற்றில், ஆடவர் ஒற்றையரில் ஹெச்.எஸ். பிரணாய் 19-21, 21-17, 21-16 என்ற கேம்களில், போட்டித்தரவரிசையில் 5-ஆம் இடத்திலிருந்த ஜப்பானின் கென்டா நிஷிமோடோவை வீழ்த்தி அசத்தினார். இந்த ஆட்டம் 1 மணி நேரம், 22 நிமிஷங்களில் முடிவுக்கு வந்தது. இருவரும் சந்தித்தது இது 8-ஆவது முறையாக இருக்க, பிரணாய் தனது 3-ஆவது வெற்றியைப் பதிவு செய்திருக்கிறார். அவர் 2-ஆவது சுற்றில் மற்றொரு ஜப்பான் வீரரான யுஷி டனாகாவை எதிர்கொள்கிறார்.

அதேபோல் கே.ஸ்ரீகாந்த் 23-21, 13-21, 21-11 என்ற கேம்களில், போட்டித்தரவரிசையில் 6-ஆம் இடத்திலிருந்த சீனாவின் லு குவாங் ஸுவை 57 நிமிஷங்களில் தோற்கடித்தார். சதீஷ்குமார் கருணாகரன் 21-13, 21-14 என்ற நேர் கேம்களில், போட்டித்தரவரிசையில் 3-ஆம் இடத்திலிருந்த சீன தைபேவின் செள டியென் சென்னை 39 நிமிஷங்களில் முறியடித்து 2-ஆவது சுற்றுக்கு முன்னேறி அசத்தியிருக்கிறார். அதில் அவர், பிரான்ஸின் கிறிஸ்டோ போபோவை சந்திக்கிறார்.